नेपाल आर्मीका सुरेन्द्र श्रेष्ठले पाँचौ ग्रान्डप्रिक्स भारोत्तोलन प्रतियोगिताको पुरुष ७७ केजीको सिनियरतर्फ मंगलबार स्वर्ण जितेका छन् । उनले स्न्याचमा ९० र क्लिन एन्ड जर्कमा ११७ गरी कूल २०७ केजी वजन उचाले । सोही तौलसमूहको जुनियरमा कञ्चनपुरका विशाल विष्ट पहिलो भए । विशालले स्न्याचमा ७२ र क्लिन एन्ड जर्कमा ९८ गरी १७० केजी वजन उठाए ।
ओलम्पिक डेको अवसरमा स्पोर्ट्स फर अल कमिसन तथा नेपाल भारोत्तोलन संघद्वारा संयुक्त आयोजित प्रतियोगिताको पुरुष ८५ केजीमा जम्मा २०५ केजी भार वहन गरेका नेपाल प्रहरी क्लबका गगन चन्दले स्वर्ण जिते । गगनले स्न्याचमा ९० केजी र क्लिन एन्ड जर्कमा ११५ केजी वजन उचाले । प्रहरीकै श्रीकृष्ण महर्जन दोश्रो र काठमाडौंका दिनेश कार्की तेश्रो भए । ९४ केजीमा आर्मीका दिनेश श्रेष्ठले स्न्याचमा ११० र क्लिन एन्ड जर्कमा १४२ गरी जम्मा २५२ केजी वजन उठाउदै पहिलो स्थान हात पारे । सो स्पर्धाको जुनियरमा सागर भण्डारी शीर्ष स्थानमा रहे । उनले स्न्याचमा ७७ र क्लिन एन्ड जर्कमा ८५ गरी जम्मा १६२ केजी भार वहन गरे ।
सातदोबाटोस्थित अन्तर्राष्ट्रिय खेलकुद परिसरमा भएको प्रतियोगिताको पुरुष १०५ केजीमा आर्मीका गगनसिंह ओली पहिलो भए । उनले स्न्याचमा १०५ र क्लिन एन्ड जर्कमा १३२ गरी कूल २३७ केजी भार उठाए ।
पुरुष १०५ केजीमाथि आर्मीका पुकार गुरुङले स्न्याचमा ११५ र क्लिन एन्ड जर्कमा १३५ गरी कूल २५० केजी भार वहन गर्दै स्वर्ण हात पारे । उक्त स्पर्धाको जुनियरमा प्रहरीका सन्दिप गुरुङ पहिलो बने । सन्दिपले स्न्याचमा ८७ र क्लिन एन्ड जर्कमा ११० गरी जम्मा १९७ केजी वजन उचाले ।
महिलाको ६३ केजीमा सप्तरीकी शान्ति चौधरीले पहिलो स्थान हात पारिन् । शान्तिले स्न्याचमा ५५ र क्लिन एन्ड जर्कमा ७२ गरी जम्मा १२७ केजी वजन उठाइन् । ६९ केजीमा आर्मीकी मनीता श्रेष्ठले स्वर्ण चुमिन् । मनीताले स्न्याचमा ५६ र क्लिन एन्ड जर्कमा ७५ गरी जम्मा १३१ केजी भार उचालिन् । ७५ केजीमा प्रहरीकी लक्ष्मी वनले स्न्याचमा ५८ र क्लिन एन्ड जर्कमा ७० सहित कूल १२८ केजी भार उठाउदै शीर्ष स्थानमा रहिन् । ७५ केजीमाथि १२ औं दक्षिण एसियाली खेलकुद (साग) की कांस्य विजेता तारादेवी पुन पहिलो भइन् । प्रहरीकी ताराले स्न्याचमा ६० र क्लिन एन्ड जर्कमा ९० गरी जम्मा १५० केजी भार उठाइन् ।