स्पोर्ट्स फर अल क्लब, नेपाल र राष्ट्रिय खेलकुद संघ, नेपालको संयुक्त आयोजनामा चौथो नेपाल कप आमन्त्रण फुटबल प्रतियोगिता साउन २४ गतेदेखि चितवनको क्याम्पाचौरमा हुने भएको छ ।
प्रतियोगिता बारे जानकारी गराउन सोमबार आयोजित पत्रकार सम्मेलनमा क्लबका अध्यक्ष एवं राष्ट्रिय फुटबल टोलीका पूर्व गोलरक्षक लोकबहादुर शाहीले प्रतियोगितामा १० टिमको सहभागिता रहने जानकारी गराए ।
प्रतियोगितामा तीन विभागीय टोली नेपाल आर्मी क्लब, नेपाल प्रहरी क्लब र सशस्त्र प्रहरी बलको एपीएफ क्लब, एनआरटी क्लब, नारायणगढ फुटबल क्लब, रुपन्देही ११, ब्वाइज युनियन क्लब, वीरगन्ज युथ एकेडेमी, एभरेष्ट क्लब चितवन तथा रौटहट जिल्ला फुटबल संघको सहभागिता रहनेछ । साउन ३१ गतेसम्म चल्ने प्रतियोगिता नकआउट पद्धतिमा खेलाइने छ ।
विजेताले ३ लाख र उपविजेताले २ लाख नगद पुरस्कार हात पार्ने छन् । सर्वोत्कृष्ट खेलाडी, फाइनलको ‘म्यान अफ द म्याच’ तथा सर्वाधिक गोलकर्ताले १०–१० हजार नगद पुरस्कार प्राप्त गर्नेछन् । अध्यक्ष शाहीका अनुसार प्रतियोगिता सञ्चालन गर्न करिब २५ लाख १० हजार रुपैयाँ खर्च हुनेछ ।