अरहान्तकेशर सिंह र भावना सुनवारले धनलक्ष्मी महर्जन स्मृति राष्ट्रिय स्क्वास प्रतियोगिताको उपाधि शनिबार जितेका छन् ।सातदोबाटोमा भएको पुरुष सिंगल्स फाइनलमा अरहान्तले अमृत थापा मगरलाई ८–११, ११–५, ११–७, ११–१३ र १२–१० को सेटमा पराजित गर्दै स्क्वासमा नयाँ स्टारका रुपमा आफूलाई प्रस्तुत गर्न सफल रहे । गत महिना सातदोबाटोमै भएको खुला स्क्वास प्रतियोगितामा पनि अरहान्तले अमृतलाई नै हराउदै पहिलो उपाधि जितेका थिए । अमृतका बुवा हीराबहादुर थापा र प्रवीणवीरसिंह कंशाकार संयुक्त रुपमा तेश्रो भए । पहिलो हुनेले १५ हजार, दोश्रोले ८ हजार र तेश्रोले ३–३ हजार नगद पुरस्कार हात पारे ।
महिला सिंगल्सको फाइनलमा भावनाले विपना ब्लोनलाई ११–५, ११–७ र ११–१ को सोझो सेटमा हराइन् । सपना ब्लोन र कृष्णा थापा मगर तेश्रो भए । शीर्ष तीन स्थान हात पार्नेले क्रमशः ९ हजार, ५ हजार र २–२ हजार नगद पुरस्कार जिते ।जुनियर ब्वाइज यु–१७ सिंगल्सको उपाधि अमिर ब्लोनले जिते । उनले फाइनलमा दीपक थापाको चुनौती ११–६, ११–७ र १४–१२ ले समाप्त पारे । विक्रम मगर र विजय मगरले तेश्रो स्थानमा चित्त बुझाए । पहिलोलाई ५ हजार, दोश्रोलाई ३ हजार र तेश्रोलाई १५ सय–१५ सयले पुरस्कृत गरियो ।
गेल्जे तामाङ जुनियर ब्वाइज यु–१३ सिंगल्स च्याम्पियन बने । गेल्जेले उपाधि भिडन्तमा सुवास गिरीलाई ११–८, ११–४ र १२–१० को सीधा सेटमा पाखा लगाए । रन्जित थापा र गोपाल थापा तेश्रो बने । पहिलोले ३ हजार, दोश्रोले २ हजार र तेश्रोले १–१ हजार नगद पुरस्कार पाए ।
भेट्रान्स ५० वर्षमाथि पुरुष सिंगल्समा च्याम्पियन बन्ने क्रममा लालबहादुर गुरुङले फाइनलमा प्रेम सिंहलाई १०–१२, ११–५, ११–६ र ११–८ ले निराश पारे । मनोजबहादुर श्रेष्ठ र महेन्द्र महर्जन तेश्रो स्थानमा रहे ।
पुरुष सिंगल्स प्लेटतर्फ अनिल शाक्यले फाइनलमा लोकेन्द्र भण्डारीमाथि ८–११, ५–११, ११–९, ११–८ र १७–१५ को संघर्षपूर्ण जित निकाल्दै शीर्ष स्थान हात पारे । विजयी मगर र विक्रम मगर तेश्रो बने ।
विजेतालाई नेपाल स्क्वास ¥याकेट संघका अध्यक्ष किशोर महर्जन, स्व. धनलक्ष्मीका पति कृष्णलाल महर्जनलगायतले एक कार्यक्रमबीच पुरस्कार वितरण गरे । स्क्वास संघका अध्यक्ष महर्जनले आफ्नी आमाको निधन भएको वार्षिक पुण्यतिथिमा प्रतियोगिता आयोजना गरेका हुन् । धनलक्ष्मीको गत वर्षको अगष्ट १ तारिखका दिन निधन भएको थियो । प्रतियोगिता पनि यहि अगष्ट १ तारिखकै दिन सुरु भएको थियो । त्यसमा विभिन्न ६ स्पर्धामा ७८ खेलाडीले प्रतिस्पर्धा गरेका थिए ।
कुल नगद पुरस्कार राशी ६३ हजार रुपैयाँ रहेको थियो जुन नेपाली स्क्वासकै सर्वाधिक पुरस्कार राशीको प्रतियोगिता भएको स्क्वास संघले जनाएको छ ।
कार्यक्रममा अध्यक्ष महर्जनले प्रतियोगितालाई तीन संस्करणसम्म नियमित आयोजना गर्ने प्रतिबद्धता जनाए ।