काठमाडौं वडा नं. ७, चावहिलको आयोजनामा हुने सिक्स ए साइड पुरुष फुटबल प्रतियोगितालाई कामाद कलेज, सुकेधाराले मुख्य प्रायोजन गर्ने भएको छ । प्रायोजनसंगै प्रतियोगिताको नाम कामाद कप सिक्स ए साइड पुरुष फुटबल प्रतियोगिता हुनेछ ।मुख्य प्रायोजन वापत कामादले प्रतियोगितको विजेता र उपविजेताको पुरस्कार राशी आयोजकलाई उपलब्ध गराउने भएको छ । विजेताले १ लाख र उपविजेताले ५० हजार नगद पुरस्कार पाउने छन् ।
कामादका प्रशासन प्रमुख अनिल प्रसाईंले अन्तर्राष्ट्रिय जगतमा राष्ट्रको गौरव अभिबृद्धि गर्ने प्रमुख माध्यम खेलकुद क्षेत्रमा प्रायोजन गर्न पाउँदा खुशी लागेको बताउदै आगामी दिनमा खेलकुदमा लगानी गर्ने सोच रहेको बताए ।
चावहिल स्पोर्ट्स क्लबका अध्यक्ष एवं प्रतियोगिता संयोजक अजब श्रेष्ठले प्रतियोगिता बिहीबारदेखि सुरु हुने शनिबार आयोजित पत्रकार सम्मेलनमा जानकारी गराए । प्रतियोगितामा ३२ टिमले नकआउट आधारमा प्रतिस्पर्धा गर्ने छन् ।
उत्कृष्ट खेलाडी, गोलरक्षक, मिडफिल्डर र डिफेन्डरलाई जनही १० हजार नगदबाट पुरस्कृत गरिने छ । प्रतियोगिता सञ्चालन गर्न करिब ६ लाख १० हजार रुपैयाँ खर्च हुने आयोजकले जनाएको छ । भदौ १८ गतेसम्म चल्ने प्रतियोगिताका खेलहरु चावहिल मैदानमा हुनेछ ।