मंगलबार सुरु भएको १५ औँ आहा रारा गोल्डकप फुटबल प्रतियोगिताको उद्घाटन खेलमा आयोजक सहारा क्लबले धनगढीको सुदूरपश्चिम ११ स्पोटिङ क्लबलाई ४–० ले पराजित गरेको छ । खेलको छैठौं मिनेटमा नै मार्टिनको गोलबाट अग्रता लिएको सहाराका लागि २७ औं मिनेटमा रिचार्ड पुनले गोल गरे । ३८ औँ मिनेटमा पेटर सेगुनले गोल गरे भने ८२ औं मिनेटमा मार्टिनले व्यक्तिगत दोस्रो गोल गरे । सहाराले शनीबार सिक्किम युनाइटेड फुटवल क्लब, भारतसँग प्रतिस्पर्धा गर्नेछ । १५ माघसम्म हुने पोखरा रङ्गशालामा हुने आहा रारा गोल्डमा विदेशी राष्ट्रबाट अमेरिकाको अना युएसए फुटबल टिम, बङ्लादेशको फरासगन्ज एससी र भारतको युनाइटेड सिक्किम फुटबल क्लबसहित १२ टिमले भाग लिएका छन् । प्रतियोगिताको विजेता टोलीले पाँच लाख एक हजार एक र उपविजेताले दुई लाख ५१ हजार एक रुपैयाँ पुरस्कार पाउने छन्।