आयोजक काठमाडौं बर्नहार्ट कलेज र क्यापिटल कलेज एन्ड रिसर्च सेन्टर (सीसीआरसी) ले आठौं बर्नहार्ट कप अन्तरकलेज बास्केटबल प्रतियोगितामा शनिबार विजयी सुरुआत गरेका छन् ।बल्खुस्थित घरेलु कोर्टमा बर्नहार्टले अरनिकोलाई ६७–२७ को फराकिलो अन्तरले पराजित ग¥यो । बर्नहार्टका अनिप महर्जनले १२ अंक जोडे । डिफेन्डिङ च्याम्पियन सीसीआरसीले ओमेगालाई ३८–३४ ले हरायो । विजयी टिमका लागि प्रवेशले ९ अंक जोडे ।ब्वाइजकै अन्य समूह चरणको खेलमा जेभियर एकेडेमी, होलीभिजन, टाइम्स र ट्रिनिटी इन्टरनेसनल कलेजले पनि जितका साथ यात्रा थाले ।जेभियर एकेडेमीले साउथ वेस्टर्न कलेजलाई ५७–२७ ले पन्छायो । विजेताका सुनील थापाले १६ स्कोर गरे । मुस्कान मग्रातीको १९ अंक सहयोगमा होलीभिजनले नाइटिङगेललाई ३४–३१ को साँघुरो अन्तरले पाखा लगायो । टाइम्सले क्याम्पियनमाथि ४०–३७ को कठिन जित निकाल्यो । टाइम्सका निमा तेन्जिङ शेर्पाले १३ अंक बटुले । ह्वाइटहाउस विरुद्धको खेलमा ट्रिनिटी ३६–३५ को झीनो अन्तरले विजयी भयो । ट्रिनिटीका बुद्ध मगरले १८ स्कोर गरे । प्रतियोगिताको आयोजक बर्नहार्टका प्रिन्सिपल नवराज अधिकारीले एक कार्यक्रमबीच उद्घाटन गरे । भदौ १८ गतेसम्म चल्ने प्रतियोगिताको ब्वाइजमा २५ र गल्र्समा ५ टिमले लिग कम नकआउट आधारमा प्रतिस्पर्धा गर्नेछन् ।