ग्रिनफिल्ड नेसनल स्कुलको आयोजनामा छैटौं ग्रिनफिल्ड कप अन्तरविद्यालय बास्केटबल प्रतियोगिता बिहीबारदेखि सुरु हुँदैछ । प्रतियोगितामा सिनियर र जुनियर ब्वाइज, सिनियर गल्र्स तथा स्टाफमा गरी ४० टिमको सहभागिता रहने ग्रिनफिल्डका प्रिन्सिपल खडकबहादुर बस्नेतले जनाएका छन् । सिनियर ब्वाइजमा १६, जुनियर ब्वाइजमा १२, सिनियर गल्र्समा १४ र स्टाफमा ८ टिमले सहभागिता जनाउने छन् । स्टाफ टिमलाई २ समूह तथा बाँकीलाई ४ समूहमा विभाजन गरी लिग कम नकआउट आधारमा खेल खेलाइने ग्रिनफिल्डका बास्केटबल प्रशिक्षक रमेश लामाले जानकारी गराए । स्टाफको समूह विजेता र उपविजेता सौझै सेमिफाइनल तथा बाँकीका समूह विजेता र उपविजेता क्वाटरफाइनलमा पुग्ने छन् ।
सिनियर र जुनियर ब्वाइजमा नेरिक, सिनियर गल्र्समा न्यु भिजन तथा स्टाफमा महामञ्जुश्री डिफेन्डिङ च्याम्पियन हुन् । आयोजकका अनुसार प्रतियोगिता सञ्चालन गर्न करिब २ लाख खर्च हुनेछ । भदौ २३ गतेसम्म चल्ने प्रतियोगिताका खेलहरु बाफलस्थित आयोजककै कोर्टमा हुनेछ ।