नेपाल पुलिस क्लब  साबिक विजेता होङग्वान्जी न्यु डायमन्ड युथ स्पोर्ट्स क्लबलाई ३–२ सेटमा पराजित गर्दै महिला तर्फ सातौँ एनभिए राष्ट्रिय महिला तथा पुरुष क्लब भलिबल च्याम्पियन बन्न सफल भएको छ । निकै नै प्रतिस्पर्धात्मक खेलमा पहिलो सेट डायमन्डले २५–२२ ले जित्यो । दोस्रो सेटमा खेलमा फर्कँदै पुलिसले २५–१७ ले खेललाई आफ्नो पक्षमा पार्दै १–१ को बराबरीमा ल्यायो । यस्तै तेस्रो सेट निकै नै सङ्घर्षका साथ डायमन्डले २७–२५ ले आफ्नो पक्षमा पारेको हो ।  चौथो सेट पुन पुलिसले २५–१९ ले जित्दै खेललाई २–२ को बराबरीमा ल्यायो । अन्तिम तथा निर्णायक खेलमा पुलिसले १५–११ ले जित्दै सातौँ एनभिए राष्ट्रिय महिला तथा पुरुष क्लब भलिबल च्याम्पियनसिपको च्याम्पियन बनेको हो । पहिलो संस्करणमा च्याम्पियन बनेको पुलिसले दोस्रो पटक च्याम्पियन बन्न लामो समय कुर्नु परेको थियो । पुलिसले नगद ४ लाख रुपैया पायो भने उपविजेता डायमन्डले २ लाख रुपैया पायो ।
यस्तै तेस्रो स्थानका लागि भएको प्रतिस्पर्धामा साबिक उपविजेता एपिएफले त्रिभुवन आर्मी क्लबलाई ३–२ सेटमा पराजित गर्दै तेस्रो हुन सफल भएको हो । पहिलो दुई सेट २५–१६ र २५–२० ले आफ्नो पक्षमा पारेको एपिएफ तेस्रो र चौथो सेट २१–२५, २१–२५ ले आर्मीलाई सुम्पन पुग्यो । अन्तिम तथा निर्णायक सेटमा १७–७ को जित निकाल्दै एपिएफ तेस्रो हुन सफल भयो । एपिएफले नगद १ लाख रुपैया पायो ।
नेपाल भलिबल सङ्घको आयोजनमा राष्ट्रिय खेलकुद परिषद्को कभर्डहलमा भएको प्रतिस्पर्धामा पुरुष तर्फ टिपटप हेल्प नेपालले सातौँ संस्करणको उपाधि उचालेको छ । पाकिस्तानी खेलाडी सम्मिलित हेल्प नेपालले साबिक विजेता त्रिभुवन आर्मी क्लबलाई ३–० को सोझो सेटमा पराजित गर्दै च्याम्पियनसिप उपाधि जितेको हो । हेल्प नेपालले आर्मी माथि २५–२१, २६–२४ र २५–२३ को सोझो  सेटमा पराजित गरेको हो ।
यस्तै एपिएफ नेपाल पुलिस क्लबमाथि ३–२ को जित निकाल्दै च्याम्पियनसिपमा तेस्रो भयो । एपिएफ १५–२५, २५–२०, २५–२३, २५–१८ ले पुलिसलाई पछाडि धकेल्दै तेस्रो भएको हो । पुलिसले नगद १ लाख रुपैया पायो ।
च्याम्पियनसिपको सर्वोत्कृष्ट खेलाडीमा महिला तर्फ नेपाल पुलिस क्लबकी उषा भण्डारी र पुरुष तर्फ टिपटप हेल्प नेपालका मुवासर राजा घोषित भए ।

च्याम्पियनसिपमा उत्कृष्ट सेटरमा महिला तर्फ पुलिसकी कमला पुन र पुरुष तर्फ आर्मीका हरि हजुर थापा भए । यस्तै डिफेन्स तर्फ न्यु डायमन्डकी सलिना श्रेष्ठ र टिपटप हेल्प नेपालका दीपक थापा रहे । सर्भर तर्फ महिलामा आर्मीकी सङ्गम महतो र पुरुष तर्फ टिपटप हेल्प नेपालका मुवासर राजा रहे । यस्तै वेस्ट ब्लकरमा महिला तर्फ एपिएफकी कविता भट्ट र पुरुष तर्फ नेपाल पुलिस क्लबका नवीन नगरकोटी रहे । वेस्ट स्पाईकरमा महिला तर्फ न्यु डायमन्डकी प्रतिभा माली र पुरुष तर्फ आर्मीका धन बहादुर भट्ट रहे । वेस्ट कोचमा महिला तर्फ नेपाल पुलिसका रुपेश विष्ट र पुरुष तर्फ टिपटप हेल्प नेपालका उत्सव खड्का रहे ।
च्याम्पियनसिपको सर्वोत्कृष्ट खेलाडीले २५ हजार र हरेक विधा (स्पाइकर, सेटर, ब्लकर, सर्भर, डिफेन्स र प्रशिक्षक) ले जनही १५ हजार रुपैयाँ प्राप्त गरे । त्यस्तै इन्टरनेट सेवा प्रदायक भाएनेटले प्रतियोगिताको विधागत उत्कृष्टलाई ३ महिना र सर्वोत्कृष्ट पुरुष र महिला खेलाडीलाई ६–६ महिनाको इन्टरनेट सेवा प्रदान गर्नेछ ।
विजयी खेलाडीहरूलाई प्रमुख अतिथि नेपाल सरकारका  मन्त्री दामोदर भण्डारी, सांसद जीवन परियार लगायतले पुरस्कार वितरण गरेका थिए ।