भारतमा हुने १२ औं दक्षिण एसियाली खेलकुद (साग) का लागि सुटिङ खेलाडीको छनोट प्रतियोगिताको पहिलो दिन मंगलबारको खेल समाप्तिसम्म पुरुष १० मिटर एयर पेस्तोलमा बाँकेका बद्रुउद्दिन अन्सारी शीर्ष स्थानमा छन् । उनले ६ सय पूर्णाङ्मा ५ सय ५२ को प्रदर्शन गरे ।
नेपाल सुटिङ संघद्वारा आयोजित प्रतियोगितामा नेपाल आर्मीका कुवेर केसी ५ सय ४८ अंकसाथ दोश्रो तथा काठमाडौंका सुमन तुलाधर ५ सय ३९ अंकसाथ तेश्रो स्थानमा छन् ।
सातदोबाटोस्थित अन्तर्राष्ट्रिय खेलकुद परिसरमा रहेको सुटिङ रेन्जमा भइरहेको प्रतियोगिताको पुरुष १० मिटर एयर राइफलमा आर्मीका दीपक सन्जेल ५ सय २५ अंक जोड्दै पहिलो स्थानमा छन् । रुपेन्देहीका अंकित बर्मा दोश्रो र नवराज बस्नेत तेश्रो स्थानमा छन् । अंकितले ५ सय १६ र नवराजले ५ सय ६ अंक जोडे । यो स्पर्धाको पूर्णाङ् पनि ६ सय रहेको छ ।
बिहीबारसम्म चल्ने प्रतियोगिताको पुरुष÷महिलामा समान २–२ गरी चार स्पर्धामा प्रतिस्पर्धा भइरहेको छ । हरेक स्पर्धामा शीर्ष तीन स्थान हात पार्ने खेलाडी सागका लागि छनोट हुने सुटिङ संघका सचिव प्रदीप खातीले जनाएका छन् ।