भारतमा हुने १२ अ‍ैं दक्षिण एसियाली खेलकुद (साग) का लागि बक्सिङ खेलाडी छनोट मंगलबार पूरा भएको छ ।विभिन्न १० स्पर्धा उत्तिनै खेलाडी सागका लागि छनोट भए । त्रिपुरेश्वरस्थित दशरथ रंगशालामा भएको चारदिने प्रतियोगितामा ५१ पुरुषले ७ स्पर्धा तथा १७ महिलाले ३ स्पर्धामा प्रतिस्पर्धा गरेका थिए । हरेक स्पर्धामा पहिलो भएका खेलाडी छनोट भएको बक्सिङ मुख्य प्रशिक्षक प्रचण्ड शर्माले जनाएका छन् ।नेपाल बक्सिङ संघद्वारा आयोजित प्रतियोगिताको महिला ४८–५१ केजीमा नेपाल आर्मी क्लब ‘ए’ की मीनु गुरुङ पहिलो भइन् । फाइनलमा मीनुले नेपाल प्रहरी क्लब ‘बी’ की दिवाना शेर्मालाई पराजित गरिन् । ५७–६० केजीमा एपीएफ ‘ए’ की सरस्वती राना मगरले आर्मी ‘ए’ की निरु गुरुङ तथा ६९–७५ केजीमा एपीएफ क्लब ‘बी’ की संगीता सुनारले एपीएफ ‘ए’ की प्रमिला पाण्डेलाई हराउदै पहिलो स्थान हात पारे ।
पुरुष ४९ केजीमा आर्मी ‘ए’ का तेजबहादुर देउवा पहिलो भए । फाइनलमा उनले बाजुराका गणेश बोहरालाई पाखा लगाए । ५२ केजीमा आर्मी ‘ए’ का प्रेम चौधरीले फाइनलमा नक्साल ‘ए’ का शक्ति लामालाई पन्छ्याउदै शीर्ष स्थान हात पारे । ५६ केजीमा प्रहरी ‘ए’ का दिनेश श्रेष्ठले आर्मी ‘ए’ का अर्जुन सिगुलाई निराश पार्दै पहिलो भए ।
त्यस्तै पुरुष ६० केजीमा दानबहादुर दर्लामी पहिलो भए । उनले फाइनलमा प्रहरी ‘ए’ भूपेन्द्र थापालाई हराए । ६४ केजीमा आर्मी ‘ए’ का दीपक श्रेष्ठ पहिलो भए । उनले फाइनलमा नक्साल ‘ए’ का निभास तण्डुकारलाई पराजित गरे । ६९ केजीको फाइनलमा एपीएफ ‘ए’ का विकास लामाले ललितपुर ‘ए’ का उमेश रिजाललाई पाखा लगाउदै पहिलो स्थानमा रहे । ७५ केजीमा आर्मी ‘ए’ का दीपेश लामाले आर्मी ‘बी’ का महेन्द्र केसीलाई फाइनलमा पराजित गर्दै सागका लागि छनोट हुने अन्तिम मुक्केवाज बने ।