अमेरिकाको फ्लोरिडामा हुने यू–१६ फुटबल फेस्टिबल तथा तालिममा सहभागी हुने जुनियर फुटबल एकेडेमिका टोलीलाई शुक्रबार बिदाई गरिएको छ । आइएमजीको आयोजनामा हुने फुटबल फेस्टिबल ३० अप्रील देखि १० मे सम्म सञ्चालन हुनेछ । उक्त फेस्टिबलका लागि १८ खेलाडी,३ अफिसियल र एक प्रशिक्षक त्यसतर्फ प्रस्थान गर्दैछन् । टोलीलाई पुर्व राष्ट्रिय फुटबलर प्रज्वल प्रताप क्षेत्रीले प्रशिक्षण गर्नेछन् । टोली अफिसियलमा डिकेस प्रधान र उपेन्द्र श्रेष्ठ छन् । पुजन लामाको कप्तानीमा रहेको खेलाडीहरुमा क्रृत दत्त,ओम दाहाल,एलेन पन्त,विपेश बुढाथोकी,अनिस थापा,विप्लप लामिछाने,प्रनब श्रेष्ठ,लिटल सुवेदी,कुशल श्रेष्ठ,रोज श्रेष्ठ,अर्मान श्रेष्ठ,प्रगति राई,अमिशा श्रेष्ठ,निक्की सुवेदी र निश्चल न्यौपाने छन् । जुनियर फुटबल एकेडेमिका यूवा फुटबलरले उक्त फुटबल फेस्टिबलमा प्रतियोगितामा सहभागिताका साथै प्रशिक्षण समेत लिनेछ । सो अवसरमा यूवा खेलाडीले अमेरिकामा रहेका क्लबहरुमा ट्रायलको अवसर प्राप्त गर्नेछन् । पानी पोखरीस्थीत लास्ट फ्राइडेमा आयोजित कार्यक्रमा उनिहरुलाई जुनियर फुटबल एकेडेमिका अध्यक्ष रिजन खड्का, लास्ट फ्राइडेका सञ्चालक राजेश कार्की र नेपालका यू–१७ उमेर समुहका प्रशिक्षक सुनिल श्रेष्ठले बिदाई गरे ।