नेपालले नवौं एनएसकेए अन्तर्राष्ट्रिय कराते प्रतियोगिताको उपाधि शुक्रबार जितेको छ । नेपालले ४० स्वर्ण, २६ रजत र १४ कांस्य जित्यो । दोश्रो भएको भारतले ३ स्वर्ण, ८ रजत र ४० कांस्य हात पा¥यो । नेपाल सोतोकान कराते संघ (एनएसकेए) द्वारा आयोजित प्रतियोगितामा नेपालका सुशान्त मोडक र कृषा शेर्पा उत्कृष्ट खेलाडी घोषित भए । पुरुषमा उत्कृष्ट बनेका सुशान्तले ४ स्वर्ण र १ रजत जिते । महिलामा उत्कृष्ट हुन सफल कृषाले ५ स्वर्ण र १ रजत हात पारिन् ।
त्रिपुरेश्वरस्थित राष्ट्रिय खेलकुद परिषद्को कभर्डहलमा भएको पुरुष खुला तौलसमूह र टिम कुमुतेमा दिवस श्रेष्ठ, एकल काता र टिम कुमुतेमा निरजकुमार श्रेष्ठ, ५० केजीमा सुरज श्रेष्ठ, २० केजीमा क्रिस मानन्धर तथा ६७ केजीमा विनोद रोकाले नेपाललाई स्वर्ण दिलाए ।
महिलाको ५० केजीमा सीता तामाङ, ३५ केजीमा सुस्मिता तामाङ, ४० केजीमा सुजना तामाङ, २० केजीमा अनिशा बजगाईं तथा २५ केजीमा निशा श्रेष्ठले नेपालका लागि स्वर्ण जिते । विजेतालाई सांसद् मोहनबहादुर बस्नेत, आयोजक संघका अध्यक्ष विष्णुबहादुर कार्की र महासचिव एवं प्रमुख प्रशिक्षक श्याम शेर्पा लगायतले एक कार्यक्रमबीच पुरस्कार प्रदान गरे । तीनदिने प्रतियोगितामा १ हजार ९८ खेलाडीले प्रतिस्पर्धा गरेको आयोजकले जनाएको छ ।