“एकताले नै सपना साकार हुन्छ” भन्ने मुल नाराका साथ किरात कोइँच स्पोर्टस क्लबले आयोजना गरेको दोस्रो अदिबासी जनजाती कप–२०७३ फुटबलको उपाधि सुनुवार सेवा समाज ललितपुरले हात पार्न सफल भएको छ । २७ बैशाखदेखि जारी प्रतियोगिता ललितपुरको सिएफएस खेल मैदानको फाइनल खेलमा सुनुवार र अञ्चल ट्याक्सी व्यवसायीबीच भएको खेलमा निर्धारित समयमा १–१ गोलको बराबरीमा टुंगिएपछि खेल पेनाल्टी सुटआउटमा पुगेको थियो । पेनाल्टी सुट आउटमा ५–४ गोलले पराजित गर्दै ललितपुरले उपाधि हात पारेको हो ।

खेलको छैठौ मिनेटमा सुमन मगरले गोल गर्दै ट्याक्सी व्यवसायीलाई अग्रता दिलाएको थिए । खेलको दोस्रो हाफमा ट्याक्सी व्यवसायीलाई दवावमा राख्दै ललितपुरले खेलको ६३औं मिनेटमा बसन्त तामाङको गोलले खेल बराबरीमा ल्याएका थिए ।

प्रतियोगितामा विभिन्न विधामा पुरस्कार वितरण गरिएको थियो । प्रतियोगिाभरिको उच्च गोलकर्ता दुरा सेवा समाजबाट निर्मल दुरा र उत्कृष्ट रक्षक कमल तामाङ, सुनुवार सेवा समाज ललितपुर घोषित भए । उत्कृष्ट फरवार्ड सुमन मगर, अञ्चल ट्याक्सी व्यवसायी र उत्कृष्ट गोलकिपर सोम सामताङ सुनुवार सेवा समाज ललितपुर घोषित भए । उत्कृष्ट मिडफिल्डर त्रिलोक दुरा दुरा सेवा समाज र प्रतियोगिताभरिकै उत्कृष्ट खेलाडी रवि थिङ सुनुवार सेवा समाज ललितपुरले हात पार्न सफल भए । पुरस्कृत खेलाडीलाई प्रमुख अतिथि सुनुवार सेवा समाजका अध्यक्ष रणवीर सुनुवारले वितरण गरे ।

प्रतियोगितामा सुनुवार विद्यार्थी समाज चौथो र दुरा सेवा समाज तेश्रो भए ।