स्किम्स उमाविको आयोजनामा प्रथम स्किम्स खुला थ्रीबाइथ्री बास्केटबल प्रतियोगिता शुक्रबारदेखि हुने भएको छ । प्रतियोगितामा ३२ ब्वाइज टिमको सहभागिता रहने स्किम्सका प्रिन्सिपल आरबी खतिवडाले जानकारी गराए । सहभागी टिमलाई विभिन्न ८ समूहमा विभाजन गरी लिगकम नकआउट आधार खेल खेलाइने छ । २०७२ सालको एसएलसी दिएर बसेका विद्यार्थीको टिमले प्रतियोगितामा सहभागिता जनाउने छन् ।
प्रिन्सिपल खतिवडाले विद्यार्थीलाई प्रतिभा प्रस्फुटन गर्ने अवसर प्रदान गर्ने उद्देश्यले प्रतियोगिता आयोजना गर्न लागेको बताए । स्किम्सका निर्देशक प्रवीण महर्जन र बास्केटबल प्रशिक्षक रमेश लामाले प्रतियोगिताको विविध पक्षबारे प्रकाश पारेका थिए ।
दुईदिने प्रतियोगिताका खेलहरु महाराजगन्ज, चक्रपथस्थित आयोजककै कोर्टमा हुने छ ।