दीपक मगर र रेगन श्रेष्ठले दोश्रो रंगशाला राष्ट्रव्यापी खुला स्नुकर प्रतियोगितामा शनिबार विजयी सुरुआत गरेका छन् । लैनचौरस्थित राष्ट्रिय टेबलटेनिस प्रशिक्षण केन्द्रमा दीपकले निरज थापालाई ३–२ तथा रेगनले निरज सिंखवाललाई ३–० को फ्रेममा पराजित गरे ।
त्यस्तै राजु चौधरीले सुजेन शाहीलाई ३–२, भुवन श्रेष्ठले रोविन पोखरेललाई ३–०, अमित अधिकारीले सारङ्ग राणालाई ३–२ तथा नितेश राजभण्डारीले फुरी शेर्पालाई ३–२ ले हराए ।
प्रतियोगिताको राष्ट्रिय खेलकुद परिषद्का पूर्व कोषाध्यक्ष मोहन राईले एक कार्यक्रमबीच उद्घाटन गरे । प्रतियोगितामा ६४ खेलाडी सहभागी छन् । पहिलो हुनेले १ लाख, दोश्रोले ५० हजार तथा तेश्रो हुने दुई खेलाडीले समान १५–१५ हजार नगद पुरस्कार प्राप्त गर्ने छन् । सर्वाधिक ब्रेक गर्नेलाई १० हजार नगदबाट पुरस्कृत गरिने छ । प्रतियोगिता जेठ २५ गतेसम्म चल्नेछ ।