नेपाल भलिबल संघको आयोजना एवं काभ्रे जिल्ला भलिबल संघको व्यवस्थापनमा १६ मंसिरदेखि १८ गतेसम्म पाँचौं राष्ट्रिय महिला तथा छैटौं राष्ट्रिय पुरुष विच भलिबल प्रतियोगिता हुने भएको छ ।
प्रतियोगितामा ५ विकास क्षेत्र र ३ विभागीय टोलीको सहभागिता रहने छ । जसमा पुरुषतर्फ १६ टिम र महिलातर्फ पनि १६ टिम गरी ६४ खेलाडीले प्रतिस्पर्धा गर्ने नेपाल भलिबल संघका महासचिव जितेन्द्रबहादुर चन्दले शुक्रबार आयोजित पत्रकार सम्मेलनमा जानकारी दिए ।
प्रतियोगिताका महिला÷पुरुष दुवै विजेता टोलीले नगद २५ हजार रुपैयाँ प्राप्त गर्नेछन् भने उपविजेताका दुवै टिमले १५ हजार र तेस्रो स्थान हासिल गर्ने टोलीले १० हजार रुपैया प्राप्त गर्नेछन् ।
प्रतियोगिता सञ्चालन गर्न नेपाल भलिबल संघका सदस्य एवं काभ्रे जिल्ला भलिबल संघका अध्यक्ष तीर्थ श्रेष्ठको संयोजकत्वमा प्रतियोगिता आयोजक कमिटी गठन गरिएको छ । नेपाल भलिबल संघले प्रतियोगिताको व्यवस्थापन गर्ने काभ्रे जिल्ला भलिबल संघलाई १ लाख २५ हजार नगदसहित बल र नेट उपलब्ध गराउने भलिबल संघका अध्यक्ष मनोरञ्जनरमन शर्माले जानकारी दिए । काभ्रे जिल्ला भलिबल संघले खेलाडीहरूको बसोबासका साथै खाना र यातायातको सम्पूर्ण सुविधा व्यहोर्ने काभ्रे जिल्ला भलिबल संघका अध्यक्ष एवं प्रतियोगिता संयोजक तीर्थ श्रेष्ठले जानकारी दिए । प्रतियोगिता सञ्चालनका लागि करिब १२ लाख ५० हजार खर्च हुनेमा बाँकी रकम काभ्रे जिल्ला भलिबल संघले व्यवस्थापन गर्ने महासचिव चन्दले जानकारी दिए ।