पाचौँ महिला तथा छठौँ राष्ट्रिय बिच भलिबल च्याम्पियनसिपमा महिलातर्फ पुलिसकी कोपीला उप्रेती र कमला पुन तथा एपीएफकी रेश्मा भण्डारी र निसाना बलालको जोडीले उपाधिका लागि प्रतिस्पर्धा गर्ने भएका छन् । दोलालघाटस्थीत इन्द्रवती खोलाको विचमा शुक्रबार भएको खेलमा कोपीला र कमलाको जोडीले आफ्नै विभागकी निता शाह र मनिषा चौधरीको जोडीलाई २१–१५ र २१–१० को सोझो सेटमा हराउदै उपाधि यात्रा तय गरेका थिए । अर्को सेमिफाइनल खेलमा एपीएफकी रेश्मा र निसानाको जोडीले पश्चिमाञ्चलकी अरुणा शाही र मञ्जू गुरुङको जोडीलाई २१–१५ र २१–१२ को सोझो सेटमा हराउदै फाइनलमा प्रवेश गरेका थिए ।
नेपाल भलिबल संघको आयोजना र काभ्रे जिल्ला भलिबल संघको ब्यवस्थापनमा सञ्चालन भएको प्रतियोगिताको पुरुषतर्फ नेपाल आर्मीका दुवै टिम फाइनलमा प्रवेश गरेका छन् । आर्मी एका दिप खड्का र रिसिधन मगरको जोडीले पुलिसका चन्द्र कुँवर र प्रज्वल मल्लको जोडीलाई २१–१५ र २१–११ ले हराउदै फाइनलमा प्रवेश गरेका छन् । अर्को सेमीफाइनलमा आर्मीकै दिल सुनार र दुर्गा महत्तोको जोडीले एपीएफका सुरेस चौधरी र मिलन मल्लको जोडीलाई २१–१४ र २१–१६ को सोझो सेटमा हराए ।फाइनल खेल शनिबार हुनेछन् ।