नेपालकी ननिता महर्जनले आठौं डब्लुबीपीएफ विश्व शारीरिक सुगठन तथा स्पोर्ट्स फिजिक च्याम्पियनसिपमा आइतबार कांस्य पदक जितेकी छिन् । ‘डेब्यु’ अन्तर्राष्ट्रिय प्रतियोगितामा ननिताले महिला एथलेटिक फिजिकको १६५ सेन्टीमिटर उचाइसम्ममा कांस्य जित्दै नेपाललाई महिला शारीरिक सुगठनमा ऐतिहासिक सफलता दिलाएकी हुन् ।
थाइल्यान्डको पटायास्थित समुद्र किनारमा रहेको एम्बासडर सिटी होटलको कन्भेन्सल हलमा भएको तीनदिने प्रतियोगिताको अन्तिम दिन ननिताले फाइनलमा चाइनिज ताइपेईंकी सुन सु तिङ र इटालीकी एलेसान्ड्रा डा सिल्भालाई पछि पार्दै कांस्य पक्का गरेकी हुन् । ५ खेलाडी सहभागी उक्त स्पर्धामा मंगोलियाकी गाम्बागा उगल्सेबेगले स्वर्ण तथा उज्वेकिस्तानकी नुरायेभा येलेनाले रजत जिते । सुन चौथो र एलेसान्ड्रा पाँचौं स्थानमा रहे । पाँचै जनाबीच पहिले प्रिजजिङ राउन्ड भएको थियो र पछि पाँचैले फाइनलमा पनि प्रतिस्पर्धा गरेका थिए ।
उद्घोषकले एलेसान्ड्रालाई पाँचौं र सुनलाई चौथो घोषणा गरेपछि ननिताको कम्तीमा कांस्य पदक निश्चित भएको खुशीयालीमा प्रतियोगिता आयोजनस्थल कन्भेन्सन हलमै रहेका ननिताका पति, बुवा, आमा, दिदी, भिनाजु, खेलाडी र अन्य नेपाली समर्थकले हुटिङ गरेका थिए ।
नेपाली शारीरिक सुगठनमा नेपाली महिला खेलाडीले कुनैपनि अन्तर्राष्ट्रिय प्रतियोगितामा पदक जितेको यो पहिलो अवसर हो । ननिता अन्तर्राष्ट्रिय प्रतियोगितामा सहभागी हुने दोश्रो नेपाली महिला खेलाडी हुन् । अन्तर्राष्ट्रिय प्रतियोगितामा पहिलो पटक प्रतिस्पर्धा गर्ने नेपाली महिला खेलाडी निर्मला महर्जन हुन् । निर्मलाले थाइल्यान्डको बैंककमै गत वर्ष भएको विश्व च्याम्पियनसिपको सातौं संस्करण तथा भुटानको थिम्पुमा भएको ५० औं एसियाली शारीरिक सुगठन च्याम्पियनसिपमा सहभागिता जनाएकी थिइन् ।
कीर्तिपुर नयाँ बजार निवासी ३१ वर्षीयाँ ननिताले ३ वर्षे छोटो शारीरिक सुगठन करियारमा एक घरेलु र एक अन्तर्राष्ट्रिय गरी जम्मा दुई प्रतियोगितामा मात्र खेलेकी छन् । काठमाडौं जिल्ला शारीरिक सुगठन तथा फिट्नेस संघले यसै वर्षको सेप्टेम्बरमा आयोजना गरेको मिस्टर काठमाडौं शारीरिक सुगठन तथा प्रथम महिला फिट्नेस च्याम्पियनसिपमा ननिताले पहिलो पटक सहभागिता जनाउदै उपाधि जितेकी थिइन् । ३ पुरुषसहति ४ नेपाली खेलाडी सहभागी भएको यो च्याम्पियनसिपमा नेपाललाई पदकविहीन हुनबाट जोगाएकी ननिताले शारीरिक सुगठनमा आउनुअघि भलिबल, एथलेटिक्स र बास्केटबल खेलेको बताइन् । क्षेत्रीय भलिबल प्रतियोगितामा ननिताको मध्यमाञ्चल टोलीले स्वर्ण जितेको थियो भने क्षेत्रीय स्तरको एथलेटिक्समा ननिताले सटपुट र १ सय मिटर दौडमा कांस्य जितेकी थिइन् ।
ननिताले शारीरिक सुगठनको महिलामा नेपाललाई पदक दिलाउन सफल भएकोमा खुशी लागेको बताउदै प्रिजजिङ राउन्ड सकिन साथ दोश्रो वा तेश्रो हुन्छु भन्ने लागेको बताइन् ।
‘राष्ट्रका लागि पदक जित्न सफल भएकोमा खुशी छु । पहिलो अन्तर्राष्ट्रिय प्रतियोगिता भएकाले कन्फिडेन्ट भएर खेल्छु र सक्दो राम्रो गर्ने प्रयास गर्छु भन्ने सोचेकी थिए ।’ ननिताले भनिन्– ‘प्रिजजिङ सकिएपछि दोश्रो वा तेश्रो हुन्छु भन्ने लागेको थियो । र, नतिजा पनि त्यही अनुसार आयो ।’
ननितले शारीरिक सुगठनमा लाग्न विशेष गरी पति रुडन वज्राचार्यले प्रेरित गरेको र यसमा परिवारका अन्य सदस्यको समेत सहयोग रहेको बताउदै महिलाले पनि उचित अवसर पाए राष्ट्रका लागि योदान दिन सक्ने बताइन् ।
ननिताका पति वज्राचार्यले पहिले उपचारका लागि शारीरिक व्यायम गर्न लगाएको र पछि ननिताले फ्टिनेसमा राम्रो गर्न सक्छिन् भन्ने लागेर शारीरिक सुगठनमा लगाएको बताए ।
‘ननितालाई ब्याक पेन हुने र टाउको दुख्ने समस्या थियो । त्यसैको उपचार गर्न मैले डिभाइन फिजिकल फिट्नेसमा व्यायम गराउन लग्ने थाले । डिभाइनमा रुजेश दाई (सातौं विश्व शारीरिक सुगठनका रजत विजेता रुजेश शाही) ननिताको व्यायमबाट प्रभावित भएर काठमाडौंमा प्रतियोगिता हुँदैछ ननितालाई पनि भाग लिन लगाउने हो कि भनेर भन्नु भयो । मैले पनि त्यसमा सहमति जनाए र प्रतियोगितामा पनि भाग लिइन् । उपाधि पनि जितिन् ।’– ननिता शारीरिक सुगठनमा लाग्नुको कारण रुडेनले प्रस्टाए ।
थाइल्यान्डमै रहेका नेपाल शारीरिक सुगठन तथा फिट्नेस संघका अध्यक्ष राजेशबाबु श्रेष्ठले ननिताको सफलताले नेपाली शारीरिक सुगठनको इतिहासमा नयाँ अध्याय थपिएको बताउदै ननिताको सफलताले नेपाली शारीरिक सुगठन मात्र नभइ सिंगो राष्ट्रलाई गौरवान्वित तुल्याएको बताए । अध्यक्ष श्रेष्ठले २०१७ को अक्टोबरमा मंगोलियामा हुने नवौं विश्व च्याम्पियनसिप तथा सोही वर्षको अगष्टमा दक्षिण कोरियामा हुने ५१ औं एसिायली च्याम्पियनसिपमा सहभागी गराउन ननितालाई विशेष तयारी गराउने बताए ।
प्रशिक्षक ज्ञानेन्द्र नकर्मीले सोचे भन्दा राम्रो नतिजा आएको बताउदै प्रशिक्षणमा अझ बढी ध्यान दिएमा ननितामा यो भन्दा राम्रो नतिजा ल्याउने खुबी रहेको धारणा व्यक्त गरे ।
प्रतियोगिताअन्तर्गत शारीरिक सुगठनको ६५ केजी र मास्टर्स ४० वर्षमाथिमा अनिललाल श्रेष्ठ, स्पोर्ट्स फिजिक र फिट्नेस फिजिकमा विमललाल श्रेष्ठ तथा स्पोर्ट्स फिजिकमा विनोद वज्राचार्यले पुरुषतर्फ नेपालको चुनौती प्रस्तुत गरेका थिए । तीनै पदकविहीन बने । अनिल र विनोद आ–आफ्नो स्पर्धामा प्रिजजिङ राउन्डबाट बाहिरिएका थिए । विमल स्पोर्ट्स फिजिकमा प्रिजजिङ राउन्डमै सीमित भए भने फिटनेस फिजिकमा फाइनलमा प्रवेश गर्दै समग्रमा चौथो भएका थिए ।
वर्षेनी हुने विश्व शारीरिक सुगठनमा यसअघि तीन नेपाली पुरुष खेलाडीले विभिन्न स्पर्धामा पदक जितिसकेका छन् । दोश्रो संस्करणको शारीरिक सुगठनतर्फ ६५ केजीमा श्याम श्रेष्ठले कांस्य तथा छैटौं संस्करणको स्पोर्ट्स फिजिकमा विमलला श्रेष्ठ (यसै प्रतियोगितामा सहभागी) र सातौंको शारीरिक सुगठनकै ५५ केजीमा रुजेश शाहीले रजत जितेका थिए ।
विश्व शारीरिक सुगठन तथा फिजिक्स स्पोर्ट्स महासंघ (डब्लुबीपीएफ) को तत्वावधानमा थाइल्यान्ड शारीरिक सुगठन तथा फिजिक स्पोर्ट्स संघद्वारा आयोजित प्रतियोगितामा ४९ राष्ट्रका ४ सय भन्दा बढी खेलाडीले विभिन्न ३८ स्पर्धामा प्रतिस्पर्धा गरेका थिए । प्रतियोगितामा डब्लुबीपीएफ अन्तर्राष्ट्रिय जजद्वय नेपालका पुष्पकुमार श्रेष्ठ र सुनील राजकर्णिकारले पनि विभिन्न स्पर्धाको प्रिजजिङ र फाइनल चरणका खेल सञ्चालन गरेका थिए । नेपाली टोली मंगलबार स्वदेश फर्किने कार्यक्रम छ ।