नमुना युथ एक्टिभ ग्रुपले न्युडायमण्ड एकेडेमिका प्रशिक्षक कुमार राईलाई सम्मान गरेको छ । ग्रुप र जिल्ला खेलकुद विकास समिती सिन्धपाल्चोकको संयुक्त आयोजनामा भएको राष्ट्रिय पुरुष खुल्ला भलिबल प्रतियोगितामा न्यु डायमण्ड एकेडेमिका प्रिन्सिपल समेत रहेका भलिबल प्रशिक्षक राईलाई सम्मान गरिएको हो । लामो समयसम्म महिला भलिबल खेलाडी उत्पादनमा सक्रिय राईलाई रक्षामन्त्रि बालकृष्ण खाँड,सभासद उदय समसेर राणा,एक्टिभ ग्रुपका अध्यक्ष सिराजा तामाङ र कार्यक्रम संयोजक शिर बहादुर तामाङ लगायतले सम्मान गरेका थिए । मानिसमा भएको संभाव्यतालाई नतिजामा परिणत गर्दै उत्कृष्ट खेलाडी उत्पादन गर्ने सफल गुरुको रुपमा राईलाई सम्मान गरिएको हो । सम्मानपत्रमा उल्लेख छ “खेलक्षेत्रमा मात्रै नभएर शैक्षिक क्षेत्र विकासका लागि पनि अहोरात्र खटिनु भएकोमा तपाईलाई यो सम्मानपत्र प्रदान गरिएको छ ।”