पुरुष फुटबल प्रतियोगितामा नेपाल पुलिस क्लबले काँस्य पदक जितेको छ । धरानस्थित एन्फा टेक्निकल सेन्टरको मैदानमा बिहीबार मध्यमाञ्चललाई ४–३ गोलअन्तरले पराजित गर्दै पुलिसले काँस्य पदक जितेको हो । प्रतिस्पर्धात्मक एवं रोमाञ्चक खेलमा पुलिसका तीर्थ राना मगरले दुई गोल गरे भने भोला सिलवालले एक गोल गरेका थिए । एक गोल भने मध्यमाञ्चलका खेलाडीले आत्मघाती गरेका थिए ।
पहिलो हाफको १३ औं मिनेटमा भेला सिलवालले गोल गर्दै पुलिसलाई अग्रता दिलाए भने २३ औं मिनेटमा रवि पासवानको पासमा तीर्थ राना मगरले गोल गरेका थिए । दोस्रो हाफको १९ औं मिनेटमा तीर्थ रानाले पुलिसको लागि तेस्रो गोल गरे भने इञ्जुरी समयमा मध्यमाञ्चलका कुदलीप कार्कीले आत्मघाती गोल गरेका थिए । मध्यमाञ्चलका लागि टंकबहादुर स्याङ्देनले २ र श्याम बाबु क्याप्छाकी मगरले एक गोल गरे । दोस्रो हाफको ५ मिनेटमा टंकबहादुरले पहिलो गोल गरेका थिए । यस्तै, १८ औं मिनेटमा श्याम बाबुले हेडमार्फत दोस्रो गोल गरे भने ३९ औं मिनेटमा टंकबहादुरले तेस्रो गोल गरेका थिए । उक्त खेलको म्यान अफ दि म्याच पुलिसका तीर्थ राना मगर घोषित भए । उनले नगद ५ हजार हात पारे । स्वर्ण पदक लागि शुक्रबार नेपाल आर्मी र सशस्त्र प्रहरी वलको एपिएफ क्लबबीच प्रतिस्पर्धा हुनेछ ।
दोश्रो सेमिफाइनलमा आर्मीले मध्यमाञ्चललाई सडन डेथमा (७–६) हराउदै बिहीबारै फाइनलमा स्थान बनाएको हो । बुधबार यि दुई टिमबीचको सेमिफाइनल निर्धारित र अत्तिरित्त समयमा कुनैपनि गोल हुन नसकेपछि खराब प्रकाशका कारण पेनाल्टी सुटआउट बिहीबार मात्र गराइएको हो ।