मध्यमाञ्चलका मदनकृष्ण कायस्थ तथा नेपाल आर्मी क्लबका क्यान्डिडेट मास्टर मोनालीसा खम्बु सातौं राष्ट्रिय खेलकुद अन्र्तगत बुद्धिचाल खेलमा स्वर्ण पदक प्राप्त गर्न सफल भएका छन् । शुक्रबार सम्पन्न नवौं चरणको खेलमा एपिएफ क्लबका सुमितसँग बराबरीको नतिजा हात पारेका मदनकृष्ण मध्यमाञ्चलकै अर्का प्रत्याशी रिजेन्द्र राजभण्डारीलाई हेडटुहेड रिजल्टका आधारमा पछि पार्दै २० औं राष्ट्रिय बुद्धिचाल च्याम्पियन समेत बनेका हुन् । ६ मा जीत र ३ मा बराबरी खेलेका मदनले ७ दशमलब ५ अंकका साथ अपराजित रहँदै प्रतियोगिताको उपाधि हात पारे । समान ७ दशमलब ५ अंक बनाउँदै रजत पदक प्राप्त गर्न सफल रिजेन्द्रले चौथो चरणमा मदनकृष्णसँग हार व्यहोरेका थिए । नेपाल आर्मी क्लबका हिमाल लामा मध्यमाञ्चलका क्षितीज भण्डारीलाई हराउँदे ६ दशमलब ५ अंकका साथ तेश्रो स्थानमा रहन सफल भए ।