नेपाल बुद्धिचाल संघ र नेकोस मकवानपुर जिल्ला समितिको संयुक्त आयोजनामा प्रेम बहादुर थापामगरस्मृति चौथौं राष्ट्रिय एमेच्योर चेस च्याम्पियनसीप सोमबारदेखि शुरु भयो ।  पहिलो चरणको खेलमा काठमाण्डौका नविन तण्डुकार, सुरज पण्डित, थापाथलि चेस पार्कका सुमित पन्त, सुशील चौधरी, आशिष फँुयाल, भक्तपुरका राज प्रजापति, सुनसरीका मणिराज डाँगी, मकवानपुरका लोक बहादुर गोले, सुन्दर कार्कीले विजयी शुरुवात गरे । हेटौडास्थित मोटेल एभाकाडो एण्ड ओर्चिड रिसोर्टमा संचालित प्रतियोगितामा भक्तपुरका विक्रम जति र केशव मानन्धर तथा रुकुमका मिलन रोका र खोटाङ्गका संजय राइबीचको खेल बराबरी भयो ।

यसअघि नेपाल बुद्धिचाल संघका अध्यक्ष एकालाल श्रेष्ठको सभापतित्वमा एक कार्यक्रमबीच प्रमुख अतिथि मकवानपुरका प्रजिअ नारायण शर्मा दवाडीले  प्रतियोगिताको उद्घाटन गरेका थिए ।

चारदिने प्रतियोगितामा नेपालका नौ जिल्लाका २६ जना खेलाडीहरु सहभागी छन् । यस प्रतियोगिताका विजेताले यहि सन् २०१७ अप्रिल १ देखि ९ तारिखसम्म इटालीमा हुने विश्व एमेच्योर चेस च्याम्पियनसीपमा नेपालको प्रतिनीधित्व गर्ने कुरा नेपाल बुद्धिचाल संघका सचिव एवं कार्यक्रम संयोजक नेकोस मकवानपुरका अध्यक्ष धरम बहादुर लामाले बताए ।