नेपाल बुद्धिचाल संघ र नेकोस मकवानपुर जिल्ला समितिद्धारा संयुक्त रुपमा आयोजित प्रेम बहादुर थापामगरस्मृति चौथौं राष्ट्रिय एमेच्योर चेस च्याम्पियनसीपमा मंगलबार दोश्रो र तेश्रो चरणका खेलहरु भए । जसमा सुनसरीका मणिराज डाँगी र थापाथलि चेस पार्कका सुमित पन्त समान ३ अंकका साथ संयुक्तरुपमा अग्रस्थानमा रहेका छन् । त्यसैगरी दुई जीत र एक बराबरी खेलेका थापाथलिकै सुशील चौधरी दोश्रो स्थानमा रहेका छन् । हेटौडास्थित मोटेल एभाकाडो एण्ड ओर्चिड रिसोर्टमा संचालित प्रतियोगितामा काठमाण्डौका नविन तण्डुकार, सुरज पण्डित, थापाथलिका आशिष फँुयाल, भक्तपुरका राज प्रजापति, केशव मानन्धर, झापाका राजन सुवेदी, सुनसरीका प्रकाश सुवेदी, मकवानपुरका बलराम सन्जेल र पर्साका फैजल अलिले समान २ अंक प्राप्त गरेका छन् ।

स्वीस लिग ९ चरणका खेल हुने चारदिने प्रतियोगितामा उत्कृष्ठ ११ जना खेलाडीहरुलाई कुल एक लाख नगद पुरस्कार प्रदान गरिने छ ।  जसमध्ये विजेताहले नगद ५० हजार हात पार्नेछ । त्यस्तै दोश्राले १५, तेश्राले साढे ७ हजार, चौथौं र पाँचौंले ५ हजार तथा छैटौंदेखि दशौंसम्मले जनही ३ हजार प्राप्त गर्ने  कुरा नेपाल बुद्धिचाल संघका सचिव एवं कार्यक्रम संयोजक नेकोस मकवानपुरका अध्यक्ष धरम बहादुर लामाले बताए ।