नेपाल तेक्वान्दो संघमा आवद्ध युनाईटेड तेक्वान्दो डोजाङ्गको आयोजनामा प्रथम काठमाण्डौ अन्तराष्ट्रिय क्योरुगी तथा पुम्से तेक्वान्दो च्याम्पियनसिप माघ २७ देखि २९ गते सम्म काठमाण्डौमा आयोजना हुने भएको छ । राष्ट्रिय खेलकुद परिषदको कभर्डहल त्रिपुरेश्वरमा आयोजना हुने प्रतियोगितामा नेपाल सहित मित्र राष्ट्र कोरिया, भारत, बंगलादेश, भुटान, मलेशिया, ईन्डोनेशिया र सिंगापुरका करिव ५ सय खेलाडीहरुको सहभागिता रहने पत्रकार सम्मेलनमा प्रतियोगिता संयोजक नोर्बु लामाले जानकारी गराए ।
१२ देखि १४ बर्षको क्याडेट महिला तथा पुरुष, १५ देखि १७ बर्षको जुनियर महिला तथा पुरुष र १७ बर्ष माथीको सिनियर महिला तथा पुरुष गरि ६ डिभिजनमा खेलाईने प्रतियोगितामा फाईट तर्फ ४० र पुम्से तर्फ ३८ स्वर्ण गरि कुल ७८ स्वर्ण पदकका लागि खेलाडीहरुले प्रतिस्पर्धा गर्ने पत्रकार सम्मेलनमा जानकारी गराईयो ।
करिब ३० लाख अनुमानित लागत रहेको प्रतियोगितामा फाइट (क्योरुगी) तर्फ प्रत्येक डिभिजनका ब्यक्तिगत र टिमका विजेता खेलाडीहरुलाई मेडल तथा प्रमाण पत्र र प्रत्येक डिभिजनका उत्कृष्ट खेलाडीहरुलाई ट्रफी तथा प्रमाण पत्रद्वारा पुरस्किृत गरिने छ । यस्तै पुम्से तर्फ ब्यक्तिगत, जोडी र टिमका प्रत्येक डभिजनका विजयी खेलाडीहरुलाई मेडल तथा प्रमाण पत्रद्वारा सम्मान गरिने आयोजकले जनाएका छन् ।
प्रतियोगितामा सहभागि हुने खेलाडीहरुमा नेपालका खेलाडीहरुलाई १ हजार दर्ता शुल्क र बिदेशी खेलाडीहरुलाई १ सय डलर दर्ता शुल्क लिईने सम्मेलनमा जानकारी गराईयो । जसमा खान, बस्नको सुविधा आयोजकले ब्यहोर्ने छन् । बंगलादेशका खेलाडीहरुलाई भने २० जना खेलाडीहरुमा ५ जनालाई निशुल्क दर्ता दिईएको छ । कोरियाबाट २ देखि ४ जना खेलाडीहरुले सहभागिता जनाउने अनुमान गरिएकोमा उक्त खेलाडीहरुको दर्ता शुल्कलाई निशुल्क गरिएको समेत पत्रकार सम्मेलनमा जानकारी गराईयो ।
प्रतियोगिता अन्तरगत पारा तेक्वान्दोको बिकास र विस्तार गर्ने उद्धेश्यले नेपाल र भारत पारा तेक्वान्दो खेलाडीहरुकोविच प्रदर्शन खेल समेत समावेश गरिएको छ ।
नेपालका क्लब तथा डोजाङ्गका खेलाडीहरुले प्रतियोगितामा सहभागिता जनाउन पाउने आयोजकले जनाएका छन् ।