राष्ट्रिय खेलकुद परिषद् (राखेप) अन्तर्गत नेपाल खेलकुद विज्ञान प्रतिष्ठान (सान) को आयोजनामा प्रथम सान उपत्यकाव्यापी अन्तर कलेज तथा विद्यालय टेबलटेनिस प्रतियोगिता सोमबारदेखि हुने भएको छ ।
कलेजतर्फ ५ र विद्यालयतर्फ १० गरी १५ स्पर्धामा प्रतिस्पर्धा हुने टेबलटेनिस खेलाडी एवं प्रतियोगिता संयोजक रिता प्रजापतिले जानकारी गराइन् । प्रजापतिले करिब ७० कलेज र विद्यालयबाट करिब ३ सय खेलाडीको सहभागिता अपेक्षा गरेको बताइन् ।
‘एक सय कलेज र स्कुललाई हामीले पत्र पठाएका छौं । ७० कलेज र स्कुलबाट ३ सयले भाग लिने अपेक्षा गरेका छौं ।’– प्रजापतिले भनिन् ।
प्रतियोगिता सञ्चालन गर्न करिब १ लाख ५० हजार खर्च हुने बताइएको छ । तीनदिने प्रतियोगिताका खेलहरु सातदोबाटोस्थित अन्तर्राष्ट्रिय खेलकुद परिसरको लुम्बिनी हलमा हुनेछ ।