कीर्तिपुर र नागर्जुन नगरपालिका प्रथम काठमाडौं अन्तर नगर कप नकआउट फुटबल प्रतियोगितामा बिहीबार सेमिफाइनलमा प्रवेश गरेका छन् । त्रिपुरेश्वरस्थित दशरथ रंगशालामा कीर्तिपुरले दक्षिणकाली नगरपालिकालाई ६–१ को फराकिलो गोलअन्तरले पराजित ग¥यो । विजयी टिमका लागि सन्जोक महर्जनले ह्याट्रिक गरे भने यम महर्जनले २ र एपेक्स महर्जनले १ गोल थपे । दक्षिणकालीका अनुप महर्जनले सान्त्वना गोल गरे ।
काठमाडौं जिल्ला खेलकुद विकास समितिको संयोजनमा काठमाडौं जिल्ला समन्वय समितिद्वारा आयोजित प्रतियोगिताको अर्को क्वाटरफाइनलमा नागर्जुनले बुढानीलकण्ठलाई टाइब्रेकरमा ४–२ ले हरायो । निर्धारित समयको खेल १–१ को बराबरीमा सकिएको थियो । खेलको ७ औं मिनेटमा किशोर तामाङले नागर्जुनलाई १–० को अग्रता दिलाएका थिए । १२ औं मिनेटमा बुढानीलकण्ठका विवेक पण्डितले बराबरी गोल फर्काए ।
बिहीबारको खेलसंगै सेमिफाइनल समीकरण पनि तयार भएको छ । शुक्रबार पहिलो सेमिफाइनल नागर्जुन र टोखा तथा अर्को सेमिफाइनल कीर्तिपुर र चन्द्रागिरी नगरपालिकाबीच हुने काठमाडौं जिल्ला खेलकुद विकास समितिका प्रमुख लीलाराम बस्नेतले जनाएका छन् ।