पदक विजेतालाई एनटीएको सम्मान नेप्लिज तेक्वान्दो एकेडेमी (एनटीए) ले आफ्ना अन्तर्राष्ट्रिय पदक विजेता खेलाडीलाई शनिबार सम्मान गरेको छ । विभिन्न तीन अन्तर्राष्ट्रिय प्रतियोगितामा नेपाललाई स्वर्ण दिलाएका खेलाडीलाई नगदसहित सम्मान गरियो । जापानमा भएको १५ औं जापान खुला अन्तर्राष्ट्रिय तेक्वान्दो प्रतियोगिताका स्वर्ण विजेता विवेक श्रेष्ठ र प्रजुन कुइकेल, अस्ट्रेलियामा भएको गोल्डकोस्ट खुला अन्तर्राष्ट्रिय तेक्वान्दो प्रतियोगिताका स्वर्ण विजेता अशोक खड्का तथा भुटानमा भएको तेश्रो अन्तर्राष्ट्रिय तेक्वान्दो प्रतियोगिताका स्वर्ण विजेता पुष्पप्रसाद गौतम नगदसहित सम्मानित भए । सोही अवसरमा जापानमा दोश्रो भएका तिलक लामा र तेश्रो भएकी प्रगति कुइकेल तथा भुटानमा दोश्रो भएका राजकुमार माझीलाई पनि प्रशंसा पत्रबाट सम्मानित गरिएको थियो । साथै जापानमा सहभागि आयुश बोहरा र भुटानमा सहभागि हुने चन्दु शाहीका साथै टिम मनेजर मधुसुदन सापकोटा र दिल गुरुङलाई सम्मानपत्र प्रदान गरियो । उनीहरुलाई कागेश्वरी मनहरा नगरपालिकाका मेयर कृष्णहरि थापा र राष्ट्रिय खेलकुद परिषद्का सदस्य उपेन्द्र पौडेलले एक कार्यक्रमबीच सम्मान गरे ।