ओलम्पिक दिवसका अवसरमा नेपाल एथलेटिक्स संघद्वारा आयोजित एथलेटिक्स प्रतियोगितामा उमेश मसहार्गी र सरस्वती भट्टराई बिहीबार पहिलो भएका छन् । पुरुषमा उमेश र महिलामा सरस्वती एक माइल दूरीको प्रतिस्पर्धामा पहिलो भएका हुन् ।
उमेशले ४ मिनेट ३२.७ सेकेन्डमा पूरा गरे । ४ मिनेट ३३.५ सेकेन्डमा अजितकुमार यादव दोश्रो तथा ४ मिनेट ३५.३ सेकेन्डमा रामजी बस्नेत तेश्रो भए ।
सरस्वतीले निर्धारित दूरी ५ मिनेट ३६.९ सेकेन्डमा सकाए । ५ मिनेट ३७.८ सेकेन्डसाथ सनमाया कार्की दोश्रो र ५ मिनेट ३८.१ सेकेन्डसाथ सरिता वासी तेश्रो स्थानमा रहे ।
विजेतालाई दक्षिण एसियाली खेलकुदका कीर्तिमानी म्याराथन धावक वैकुण्ठ मानन्धरलगायतले पुरस्कृत गरे । एकदिने प्रतियोगितामा १ सय ५० खेलाडीले प्रतिस्पर्धा गरेको एथलेटिक्स संघका सचिव आरके विष्टले जनाएका छन् ।