राष्ट्रिय च्याम्पियन संरक्षकभूषण वज्राचार्य, प्रेरणा कोइराला, संरक्षकका सहोदर भाइ सम्यकभूषण र रायना शाह प्रथम एएनएलटीए÷जेटीआई राष्ट्रिय जुनियर टेनिस प्रतियोगितामा बिहीबार पहिलो भएका छन् । आ–आफ्नो स्पर्धामा च्याम्पियन बनेका संरक्षकले यु–१८ ब्वाइज सिंगल्स, प्रेरणा यु–१४ गल्र्स सिंगल्स, सम्यकले यु–१४ ब्वाइज सिंगल्स तथा रायनाले यु–१२ गल्र्स सिंगल्समा बाजी मारे ।
सातदोबाटोस्थित टेनिस कोर्टमा भएको यु–१८ ब्वाइज सिंगल्सको राउन्ड रोविन लिगको आफ्नो अन्तिम खेलमा संरक्षकले निनवाम राईलाई ६–० र ६–० ले सहजै पराजित गरे । चार खेलाडी सहभागी उक्त स्पर्धामा संरक्षक सबै तीन प्रतिद्वन्द्वीलाई हराउन सफल भए । सो स्पर्धामा प्रणव खनालले साम्राज्ञ कट्वाललाई ६–० र ६–० को सीधा सेटमा हराउदै दोश्रो भए । उनले दुई खेलमा जित हात पारे । एक खेलमा विजयी साम्राज्ञ तेश्रो भए ।
यु–१४ गल्र्स सिंगल्सको फाइनलमा प्रेरणाले सलोनी तामाङलाई सीधा सेटमा ६–३ र ६–३ ले पाखा लगाइन् । प्रतिद्वन्द्वी आदित सुवेदीबाट फाइनलमा वाक ओभर पाएपछि सम्यकलाई भने उपाधि जित्न गाह्रो भएन । यु–१२ गल्र्स सिंगल्समा च्याम्पियन बनेकी रायनाले ईशाश्रीको चुनौती ६–४ र ६–० ले समाप्त पारिन् ।