नेपाल बास्केटबल संघको सहकार्यमा ललितपुर जिल्ला बास्केटबल संघले नेबा प्रेसिडेन्ट कप थ्री बाइ थ्री राष्ट्रव्यापी पुरुष तथा महिला बास्केटबल प्रतियोगिता आयोजना गर्ने भएको छ । आयोजक संघका महासचिव शरद विष्टले बिहीबार आयोजित पत्रकार सम्मेलनमा दुईदिने प्रतियोगिता शनिबारदेखि सुरु हुने जानकारी गराए । त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा हुने प्रतियोगिताको पुरुषमा ४८ तथा महिलामा १२ टिमको सहभागिता रहने छ । उपत्यका बाहेक रुपन्देही, धरान, काभ्रे, विराटनगर र झापाबाट टिम सहभागी हुने बताइएको छ ।
नेपाल बास्केटबल संघका अध्यक्ष समेत रहेका राखेपका उपाध्यक्ष लामा टेन्डी शेर्पाले प्रतियोगिताले फिबा विश्व वरीयतामा नेपालको स्थान सुधार गर्न सहयोग पुग्ने बताए ।
पुरुषको विजेताले ४० हजार र उपविजेताले २० हजार नगद पुरस्कार प्राप्त गर्नेछन् । महिलामा पहिलो हुनेलाई ३० हजार र दोश्रोलाई १५ हजार नगदबाट पुरस्कृत गरिने छ । दुवै समूहका उत्कृष्ट खेलाडीलाई जनही १५ हजार नगद पुरस्कार प्रदान गरिने छ ।