एन्जल्स हार्ट चौथो बृहस्पति कप अन्तरविद्यालय मिनी बास्केटबल प्रतियोगिताको ब्वाइजमा सोमबार क्वाटरफाइनलमा प्रवेश गरेको छ । एन्जल्स हार्टले रोज बर्डलाई ३७–१० ले पराजित गर्दै समूह ‘सी’ को विजेता बन्यो । एन्जल्स हार्टको जितमा शेखरले १९ अंक योगदान गरे ।
ब्वाइजकै अन्य खेलमा एलआरआईले श्रीदिवालाई २२–६, पुष्पसदनले बाबालाई २७–१४ र स्वर्णिमले आयोजक बृहस्पति विद्या सदनलाई २४–६ ले हराए । एलआरआईका कुल्साङ शेर्पाले ११, पुष्पसदनका आशिष कुँवरले १६ र स्वर्णिमका आयुश पन्तले १५ स्कोर गरे ।
गल्र्समा एलआरआई, संस्कृति र इनोभेटिभले सफलता पाए । एलआरआईले श्रीदिवामाथि १६–६ को जित रच्यो । विजेताकी दीपशिखाले ७ अंक बटुलिन् । प्राश्नाको ४ अंक सहयोगमा संकृतिले आयोजक बृहस्पति ‘ए’ लाई १०–४ ले पन्छायो । आयोजक बृहस्पति ‘बी’ विरुद्धको खेलमा इनोभेटिभ ४३–२१ ले विजयी भयो । इनोभेटिभकी सभ्यता महर्जनले २० स्कोर गरिन् ।