सक्षम बिक्रम शाह पाँचौ नेपाल जूनियर खुला लन टेनिस च्याम्पियनशिप अन्तर्गत ब्वाइज अन्डर– १० को उपाधि विजेता बनेका छन् । ललितपुर सातदोबाटोस्थित लन टेनिस कोर्टमा सोमबार भएको फाइनलमा सक्षमले राजबीर प्रधानलाई ६–४, ६–४ को सेटमा हराउँदै च्याम्पियन बनेका हुन् । यस्तै सोमबार प्रतियोगिताका ब्वाइज तथा गल्र्स अन्डर– १२ र अन्डर– १४ स्पर्धाको सेमिफाइनल खेलहरु सम्पन्न भए ।
अन्डर–१२ ब्वाइजको फाइनलमा प्रणव मानन्धर र आरभ सम्राट हाडाले फाइनलमा स्थान पक्का गरेका छन् । प्रणवले आयुष्मान घलेलाई ६–०, ६–१ ले तथा आरभले अन्डर १० का उपाधि विजेता सक्षम बिक्रम शाहलाई ६–१, ६–२ ले हराउँदै फाइनलमा स्थान सुरक्षित गरेका हुन् । यसै उमेर समूहको गल्र्स स्पर्धामा भने सुभाङ्गी लक्ष्मी शाह र आजा रेग्मीले उपाधिका लागि भिडन्त गर्ने भएका छन् । सुभाङ्गीले इभा अधिकारीलाई ६–३, ६–३ ले तथा आजाले आइशा डोल्कर गुरुङ्गलाई ६–२, ६–४ ले हराउँदै फाइनलमा प्रवेश गरेका हुन् ।
यसैगरी अन्डर– १४ ब्वाइज स्पर्धाको फाइनलमा एभ्यक जोशी र आर्यन गिरीले उपाधि भिडन्त तय गरेका छन् । सेमीफाइनलमा एभ्यकले प्रणव मानन्धरलाई ७–५, २–६, ६–३ ले हराउँदा आर्यनले आरभ सम्राट हाडालाई ७–५, ४–६, ६–१ ले पाखा लगाएका थिए । यसै उमेर समूहको महिला स्पर्धाको फाइनलमा सलोनी तामांग र रायना शाहले स्थान पक्का गरेका छन् । सलोनीले ईशाश्री शाहलाई ६–४, ६–४ ले तथा रायनाले शर्भानी श्रेष्ठलाई ६–२, ६–२ सेटमा हराउन सफल भईन् ।