आठौं राष्ट्रिय खेलकूदअन्तर्गत ४४ औं राष्ट्रिय एथलेटिक्सको ४ सय मिटर दौडको पुरुषमा एपीएफका नीरप्रताप महतो र महिलामा आर्मीकी तुलसी खत्री आइतबार पहिलो भएका छन् ।
निर्धारित दूरी तय गर्न नीरले ४९.४ सेकेन्ड तथा तुलसीले १ मिनेट समय लगाए । पुरुषमा एपीएफका शिवराज पार्की दोश्रो तथा प्रदेश १ का प्रकाश दनुवार तेश्रो भए । महिलामा आर्मीकी संगीता मेचे दोश्रो तथा प्रदेश ५ की अरुणा रिजाल तेश्रो बने ।
पुरुष ५ हजार मिटर दौडमा एपीएफका गोपीचन्द्र पार्की पहिलो भए । उनले १४ मिनेट ४४.३ सेकेन्डमा दौड पूरा गरे । प्रदेश ६ का दुर्गा बुढा दोश्रो तथा प्रदेश ४ का अनिश थापा तेश्रो भए । सो स्पर्धाको महिलामा प्रदेश ३ की सन्तोषी श्रेष्ठ निर्धारित दूरी १६ मिनेट ३८.६ सेकेन्डमा तय गर्दै पहिलो बनिन् । आर्मीकी विश्वरुपा बुढा दोश्रो तथा एपीएफकी विन्द्रा धान्के श्रेष्ठ तेश्रो भए ।
पुरुष १ सय १० मिटर हर्डल्समा आर्मीका नीरकुमार चौधरी पहिलो भए । उनले १५.६ सेकेन्ड समय लगाए । प्रहरीका चन्द्रदेव जोशी दोश्रो तथा आर्मीका अशोक कुँवर तेश्रो भए । महिला १ सय मिटर हर्डल्समा प्रदेश ५ की प्रमिला थारुले स्वर्ण जितिन् । प्रमिलो १६.३ सेकेन्डमा निर्धारित दूरी सिध्याइन् । प्रदेश ५ की जयरानी चौधरीले रजत तथा आर्मीकी तुलसा श्रेष्ठले कांस्य जिते ।
पुरुष ४ गुणा ४ सय मिटर रिलेमा एपीएफ पहिलो, आर्मी दोश्रो र प्रदेश ५ तेश्रो भए । उक्त स्पर्धाको महिलामा आर्मी पहिलो, एपीएफ दोश्रो र प्रदेश ५ तेश्रो भए ।
पुरुष ट्रिपल जम्पमा प्रदेश ५ का भुवन महतो पहिलो भए । उनले १४.०६ मिटर हाम्फाले । आर्मीका डिल्ली खत्री दोश्रो र आर्मीका आशिष चौधरी तेश्रो भए । सो स्पर्धाको महिलामा ११.४ मिटर हाम्फालेकी एपीएफकी शिला चौधरी पहिलो भइन् । प्रदेश ५ का पूजा चौधरी र सीमा चौधरी क्रमशः दोश्रो र तेश्रो भए ।