बुटवल लुम्बिनी एफसीले दुई पटकको अग्रता जोगाउन नसके पछि खुकुरी एनएसएलको अङ्क तालिकामा धनगढी एफसीको शीर्ष स्थानमा यथावतै रहेको छ । शनिवार भएको खेलमा धनगढीले चितवन एफसीलाई ३–० ले हरायो भने बुटवलको विराटनगर सिटी एफसीसंग २—२ गोलको बराबरी भयो ।

छैटौँ मिनेटमा नुराइन करिमले बुटवललाई अग्रता दिलाएको खेलको ४२ औ मिनेटमा पेड्रो मान्जीले विराटनगरका लागि बराबरी गोल गरे ।
६८ ओ मिनेटमा लक्ष्मण रुचालको गोलमा बुटवलले अग्रता लिए पनि इन्जुरी समयमा सन्तोष तामाङले बराबरी गोल गरे । मान्जी खेलको सुपर प्लेयर भए । बुटवलका सुमन लामा इमर्जिङ प्लेयर भए ।
यस अघि शनिवारको पहिलो खेलमा पहिलो हाफ गोल रहित बराबरीको अवस्था रहे पनि निसान लिम्बुले ६३ औ मिनेटमा गोल गरे । ओलावाले अफीजले ६८ औ तथा बुद्ध बल तामाङले ७९ औ मिनेटमा गोल गरे ।
चार खेलको समाप्तिमा धनगढी ७ अङ्क सहित शीर्ष स्थानमा रहेको छ । यसै गरी ३ खेलमा ५ अङ्क सहित बुटवल दोस्रो स्थानमा रहेको छ । विजयी टोलीका निसान लिम्बू सुपर प्लेयर भए भने बुद्ध बल तामाङ इमर्जिङ प्लेयर भए ।