विश्व चोङमुकवान हेडक्वार्टर कोरियामा यही नोभेम्बर ६  र ७ मा भएको इपुम्से अनलाइन तेक्वान्दो च्याम्पियनसिपमा नेपालका राजु नगरकोटी र कल्पना थापा काकीले स्वर्ण पदक जितेका छन् । राजुले पुरुष ५० वर्ष माथिको उमेर समूह तथा कल्पनाले ४० वर्ष माथिको उमेर समूहमा स्वर्ण पदक जितेका हुन् ।

तेक्वान्दोमा समर्पित राज लामो समय मकाउ बसाइ पछि यसै वर्ष अमेरिका पुगेका हुन् । यस अघि लस भेगासमा भएको युएस ओपनमा दुई पटक सहभागी भई सकेका उनले बेलायतमा भएको प्रतियोगितामा पनि स्वर्ण पदक जितेका थिए । क्यानडामा भएको प्रतियोगितामा पनि सफलता पाएका उनले मकाउमा पनि थुप्रै सफलता पाएका थिए ।

नुवाकोटका राजु नेपाली तेक्वान्दोमा रहेका इमानदार र असल व्यक्तिकै रूपमा परिचित छन् । सहयोगी भावना भएका उनी त्यत्तिकै मिलनसार पनि हुन् । हाल अमेरिकामा उनी पूर्णकालीन तेक्वान्दोकर्मीको रूपमा सक्रिय छन् ।

यसै गरी कल्पना कार्की पनि तेक्वान्दो प्रशिक्षण केन्द्र चलाएर बसेकी छिन् । नेपाली तेक्वान्दोमा अहिले पनि कल्पनाको भूमिका रहेको छ ।