जुनियर विश्व ब्याडमिन्टन वरीयताको शीर्ष स्थानमा पुगेका नेपाली ब्याडमिन्टन स्टार प्रिन्स दाहाललाई इनास इन्टरप्राइजेज (योनेक्स सनराइज को नेपाल का लागि आधिकारिक बिक्रेता) का प्रोप्राइटर राजु बास्तोलाले नगद पुरस्कार र एक वर्षसम्म खेल सामग्री दिने घोषणा गरेका छन् ।

विश्व ब्याडमिन्टन फेडेरेसनले जारी गरेको वार्षिक वरीयतामा सिंगल्सतर्फ दाहाल पहिलो नम्बरमा परेका छन् । व्यवसायी बास्तोलाले उनको कम्पनी इनास इन्टरप्राइजेजको तर्फबाट दुई लाख रुपैयाँ पुरस्कार र एक वर्षसम्म ब्याडमिन्टन खेल्नका लागि आवश्यक सबै सामग्रीहरू योनेक्स ब्रान्ड कै उपलब्ध गराउने घोषणा गरेका छन् । योनेक्स विश्व प्रसिद्ध जापानको ब्रान्ड हो ।

ब्याडमिन्टन खेल्नको लागि उसलाई एक वर्षसम्म आवश्यक पर्ने सबै खेल सामग्री र एसियाली मुलुकमा जाँदा आउँदा लाग्ने टिकट पनि उपलब्ध गराउँछु,’ बास्तोलाले भने । शनिवार ठमेलको रमादा इन्कोर होटेलमा आयोजित एक सम्मान कार्यक्रममा बास्तोलाले दाहाललाई पुरस्कार र सम्मान स्वरूप सहयोग गर्ने घोषणा गरेका थिए र यो घोषणा ब्याडमिन्टन खेलाडीले प्राप्त गर्ने अहिले सम्म कै सबै भन्दा ठुलो राशि हो।

नेपाली खेल क्षेत्रको विकासमा आफ्नो पनि योगदान रहोस् र अन्य खेलाडीलाई प्रोत्साहन मिलोस् भन्ने उद्देश्यले सहयोग घोषणा गरेको बास्तोलाले बताए । उनलाई मात्रै होइन । अन्य खेलाडीले पनि यस्तो उत्कृष्ट स्थान हासिल गरेमा सहयोग गर्छु,’ उनले भने । ओलम्पिक मान्यता प्राप्त खेलमा नेपाली खेलाडी विश्व वरीयताको शीर्ष स्थानमा पुग्ने पहिलो रेकर्ड दाहालले बनाएर नयाँ इतिहास रचेका छन् । विश्व ब्याडमिन्टन फेडेरेसनले जारी गर्ने वार्षिक वरीयतामा सिंगल्सतर्फ दाहाल पहिलो नम्बरमा परेका हुन् । फेडेरेसनले गत बुधवार वरीयता सार्वजनिक गरेको थियो ।

 प्रतियोगितामा प्रदर्शनको आधारमा फेडेरेसनले हरेक हप्ता वरीयता सार्वजनिक गर्ने भए पनि कोरोना महामारीका कारण एक वर्षदेखि वरीयता सार्वजनिक भएको थिएन । एक वर्षपछि सार्वजनिक वरीयतामा दाहाल जुनियर विश्व ब्याडमिन्टन वरीयताको शीर्ष स्थानमा परेका थिए ।