एसिया रग्बीको आयोजनामा हुन गई रहेको एसिया रग्बी सेभेन्स ट्रफी २०२२ ( एआरएसडी) मा सहभागी नेपाली टोलीको टुङ्गो लागेको छ । छनोट हुने खेलाडीमा एलिसा थापा, सृजना राई, सावित्री पुर्जा, मनीषा थापा मगर,

सबिना महर्जन, पञ्चमाया श्रेष्ठ, नानी तामाङ र सुजिना गुरुङ छन् । यसैगरी, अपना पौडेल, शर्मिला राई, र विशाखा राई पनि छनोट भएका छन् ।

इन्डोनेसियाको जकार्तामा ६ र ७ अगस्टमा हुने प्रतियोगितामा सहभागी जनाउने टोलीको बन्द प्रशिक्षण अहिले काठमाडौँमा भई रहेको छ । नेपालले महिला स्पर्धामा मात्र सहभागिता जनाउँदै छ । बन्द प्रशिक्षणमा रहेका ३५ खेलाडीबाट दोस्रो चरणमा १८ खेलाडीको छनोट भएको हो ।

नेपाली पुरुष रग्बी टोलीले भने भर्खरै बङ्गलादेशमा भएको वङ्गबन्धु बङ्गलादेश नेपाल अन्तर्राष्ट्रिय रग्बी सिरिजमा सहभागिता जनाएको थियो ।

उक्त बन्द प्रशिक्षणमा टङ्क राज गिरि र विनोद तामाङले प्रशिक्षण दिई रहेका छन् । यस प्रतियोगिता नेपाली रग्बीको अन्तर्राष्ट्रिय क्षेत्रमा पाइला टेक्ने क्रममा महत्त्वपूर्ण कोशे ढुङ्गा साबित हुने विश्वास लिएको नेपाल रग्बी सङ्घका कार्यवाहक अध्यक्ष दीपक देवकोटाले बताए ।