पोखरामा जारी नवौँ राष्ट्रिय खेलकुद अन्तरगतको फेन्सिङ प्रतियोगितामा बागमती प्रदेशले पहिलो स्वर्ण हात पारेको छ । बागमती टिमले महिला व्यक्तिगत सावर विधामा स्वर्ण जितेको हो । शिक्षा नापितले बागमतीको लागि नवौँमा पहिलो स्वर्ण दिलाएकी हुन् । उनले एपिएफकी उर्मिला लामालाई पराजित गर्दै स्वर्ण जितेकी हुन् । तेस्रो स्थानमा सेनाका रविना थापा र मनीषा श्रेष्ठ रहे ।
पोखराको ब्याडमिन्टन कभर्डहलमा भएको प्रतियोगितामा इपी महिला व्यक्तिगत तर्फ सेनाले वर्चस्व बनायो । सेनाका इन्दिरा पौडेलले स्वर्ण जित्दा सिता पाठक रजतमा खुम्चिइन् । यस्तै सेनाकी पूजन कुमालले कास्य जित्दा अर्को कास्य एपिएफकी जानुका स्याङ्गतानले जितिन् ।
पुरुष तर्फ सुदूरपश्चिम प्रदेशका जलेन्द्र शाहीले आफ्नो प्रदेशका लागि स्वर्ण जिते । उनले बागमतीका संजीप लामालाई पराजित गर्दै स्वर्ण जितेका हुन् । सेनाका वीर सिंह शाही र एपिएफका शेरसिंह ऐरीले कास्य पदका चित्त बुझाए ।
विजयी खेलाडीहरूलाई बागमती प्रदेशका सदस्य सचिव सूर्यलाल भण्डारी, सुदूरपश्चिम प्रदेशका सदस्य सचिव दीपक सिंह र राष्ट्रिय खेलकुद परिषद्का प्रशासन विभाग प्रमुख मधुसूदन बस्नेतले पुरस्कृत गरेका थिए ।
फेन्सिङको आज तीन स्वर्णको छिनोफानो भएको छ ।
प्रतियोगिताको अर्थमन्त्री जर्नादन शर्माले उद्घाटन गरेका थिए । प्रतियोगितामा दुई विभागीय सहित ६ टिमको सहभागिता रहेको छ ।
विभागीय टोली नेपाल आर्मी, सशस्त्र प्रहरी बल, गण्डकी प्रदेश, बागमती प्रदेश, प्रदेश नम्बर १ र सुदूरपश्चिम प्रदेशले प्रतियोगितामा भाग लिएका छन् । प्रतियोगितामा प्रत्येक टोलीमा १२ महिला र १२ पुरुष गरी २४ जना खेलाडीले सहभागिता जनाएका छन् ।
फेन्सिङ अन्तरगत ईपी, फोयल र सावर गरी तीन इभेन्टमा प्रतिस्पर्धा भइरहेको छ । प्रतियोगिता राउन्ड रोविनको आधारमा हुने प्राविधिकले जनाएका छन् ।
नवौँ राष्ट्रिय प्रतियोगिताको पहिलो स्वर्ण नेपाल पुलिस क्लबले जितेको थियो । पुलिसले पुरुष क्रिकेटमा पहिलो स्वर्ण जित्दै स्वर्ण तालिकामा पहिलो स्थान बनाउन सफल भएको थियो ।