साफ यू–२० महिला च्याम्पियनसिप फुटबलको उपाधि आयोजक बंगलादेशले जितेको छ । ढाकास्थित विर श्रेष्ठ शहिद सिपाही मुस्तोफा कमल स्टेडियममा बिहीबार भएको फाइनलमा बंगलादेशले नेपाललाई ३–० गोल अन्तरले पराजित गर्दै च्याम्पियन बनेको हो । फाइनलमा पराजित भएसँगै नेपालले भने उपविजेतामै चित्त बुझाएको छ । बंगलादेश अपराजित रहँदै उपाधि जित्न सफल रह्यो ।
बंगलादेशलाई जित दिलाउन शाहिदा अक्टर रिपा, शामसुनाहर जुनियर र उन्नोती खातुनले एक–एक गोल गरे । राउण्ड रोबिनको आधारमा भएको प्रतियोगिताको शीर्ष दुई टोलीले उपाधिका लागि प्रतिस्पर्धा गरेका हुन् ।
चार राष्ट्र सहभागी प्रतियोगितामा नेपाल दोस्रो स्थानमा रहदै फाइनल खेलेको हो भने बंगलादेश शीर्ष स्थानमा रहेर फाइनल खेलेको थियो ।