अक्टोबर ११ देखि अस्ट्रेलियामा आयोजना हुने योनेक्स बैन्डीगो अन्तर्राष्ट्रिय ब्याडमिन्टन सिरिजमा नेपाल ब्याडमिन्टन संघले कुनै पनि खेलाडीको छनोट नगराई सहभागी गराउने भएको छ । 

जानकारी अनुसार नेपालको तर्फबाट प्रिन्स दाहाल, विष्णु कटुवाल र प्रफुल्ल महर्जन पुरुष तर्फ र महिला तर्फ नङसल तामाङ र अनुमाया राईले सहभागिता जनाउन लागेका हुन् । पछिल्लो तीन महिना यताको छनोट प्रतियोगितालाई आधार मान्ने हो भने एसियाडका लागि भएको छनोटमा सुनिल जोशी दोस्रो, विष्णु कटुवाल तेस्रो र जीवन आचार्य चौथो भएका थिए । यसै गरी बरीयतामा नेपालमा रहेका मध्ये तेस्रो स्थानमा दीपक बोहरा छन् । सङ्घको यो निर्णयले ब्याडमिन्टन  खेलाडीको असन्तुष्टि भुसको आगो झैँ सल्किए पछि कोही पनि बोल्न सकेका छैनन् । 

सुरुमा प्रिन्स र  कटुवाललाई पठाउने तयारी गरेका कारण खेलाडी भित्र विरोधको आवाज बढ्न थाले पछि प्रफुल्लको नाम थपिएको  हो । स्मरणीय छ पछिल्लो समय भएको प्रधानमन्त्री कप ब्याडमिन्टनको फाइनलमा प्रफुल्लले प्रिन्सलाई हराएका थिए ।

 विगतका गतिविधिका कारण म्यानपावरको ट्याग लागेको ब्याडमिन्टन संघले यस पटक पनि एक जना सिनियर खेलाडीलाई भिसा लगाउनकै लागि अस्ट्रेलिया पठाउन लागेको आरोप आन्दोलनरत खेलाडीको छ । टिम मेनेजर पनि भिसा लगाउनकै लागि दुई जना पठाउन लागेको कुरा उनीहरूले बताएका छन् ।