अखिल नेपाल खेलकुद महासङ्घले खेलाडीहरूको बहु प्रतीक्षित दसौँ राष्ट्रिय खेलकुद आयोजना प्रभावित नगर्न माग गर्दै आगामी वर्ष प्रचण्ड कप २०८२ राष्ट्रिय पुरुष तथा महिला भलिबल प्रतियोगिता गर्ने भएको छ ।

अखिल नेपाल खेलकुद महासङ्घको केन्द्रीय समितिको विस्तारित बैठकले लामो इतिहास बोकेको राष्ट्रिय खेलकुद प्रभावित नगर्न माग गर्दै आफ्ना विभिन्न कार्यक्रमहरू सार्वजनिक गरेको हो । गणतन्त्र दिवसको अवसर पारेर प्रचण्ड कप पुरुष तथा महिला राष्ट्रिय भलिबल प्रतियोगिता गर्न लागेको महासङ्घका महासचिव अञ्जन धमलाले जानकारी दिए । प्रचण्ड नेतृत्व सरकारले नै भलिबललाई राष्ट्रिय खेल घोषणा गरेकाले गणतन्त्र दिवसका अवसरमा सोही खेलको प्रतियोगिता आयोजना गर्न लागिएको महासङ्घ महासचिव अञ्जन धमलाले जानकारी दिए ।

‘गणतन्त्र स्थापना र भलिबललाई देशको राष्ट्रिय खेल बनाउन अध्यक्ष प्रचण्डको भूमिका महत्त्वपूर्ण रहेको सबैलाई थाहा नै छ । तत्कालीन प्रचण्ड सरकारले २०७४ साल जेठ ९ गते भलिबललाई राष्ट्रिय खेल घोषणा गरेको थियो । त्यसैले पनि जेठमा नै भलिबल प्रतियोगिता गर्न लागेका हौँ,’ अखिल नेपाल खेलकुद महासङ्घ धमलाले भने,‘यो आयोजना बृहत् र विशेष हुन्छ । त्यसबारे थप जानकारी पनि दिनेछौँ ।’ नेकपा माओवादी केन्द्रका अध्यक्ष एवम् पूर्व प्रधानमन्त्री पुष्पकमल दाहाल ‘प्रचण्ड’ को प्रमुख आतिथ्यमा बसेको महासङ्घको केन्द्रीय समितिको विस्तारित बैठकले महत्त्वपूर्ण ६ वटा निर्णय गरेको थियो । आगामी २०८२ साल मङ्सिर ८ गते पूर्वजनमुक्ती सेना राष्ट्रिय फुटबल प्रतियोगिता गर्ने महासङ्घले जनाएको छ ।

व्यापक र व्यावसायिक खेल, खेलाडीको सम्मान, समाजवादको यात्रामा दोस्रो राष्ट्रिय सम्मेलन भन्ने मूल नाराका साथ महासङ्घको राष्ट्रिय सम्मेलन सोही वर्षको असार ६ र ७ गते काठमाडौँमा गर्ने निर्णय गरिएको छ । महासङ्घले योङ ब्रदर्स तेक्वान्दो क्लबसँगको सहकार्य एसियन मार्सल आर्ट्स गेम्स तथा खेलकुद महोत्सव गर्ने भएको छ । उक्त मार्सल आर्ट्स गेम्स आगामी जेठ २ र ३ गते गर्ने गरी महासङ्घले तयारीसमेत थालेको छ । अध्यक्ष प्रचण्डको नेतृत्व तत्कालीन सरकारले ६० करोड विनियोजन गर्दै गत मङ्सिरमा नै कर्णाली प्रदेशमा बृहत् दसौँ राष्ट्रिय खेलकुद सम्पन्न गर्ने वातावरण सिर्जना गरेको महासङ्घले गरेको छ । पहिलोपल्ट राष्ट्रिय खेलकुद आयोजना अगावै बजेट सुनिश्चितता हुँदा पनि खेलकुद सञ्चालन हुन नसक्नुले खेलाडीहरू खेल्न पाउने अधिकारबाट वञ्चित भएको महासङ्घले चिन्ता व्यक्त गरेको छ ।

साथै महासङ्घले तेस्रोपल्ट आयोजना मिति तय भए पनि वर्तमान सरकारले बजेट कटौती गरेको हुँदा अझै अनिश्चितताको बाटोतर्फm देखिएको आरोप लगाएको छ । अखिल नेपाल खेलकुद महासङ्घले नेपाली खेलकुदका सरोकारवाला निकाय युवा तथा खेलकुद मन्त्रालय, राष्ट्रिय खेलकुद परिषद् र नेपाल ओलम्पिक कमिटीबिच देखिएको द्वन्द्वका कारण खेलाडीको मनोबल घट्नुका साथै अन्तर्राष्ट्रिय प्रतियोगितामा सहभागिताका लागि पनि अन्योलपूर्ण अवस्था सिर्जना भइरहेको प्रति चासो व्यक्त गरेको छ । त्यसैले समयमा नै तीन पक्षले आपसी छलफलबाट समस्या समाधान गर्न महासङ्घले जोडदार अपिल गरेको छ । अन्यौलतापूर्ण वातावरणले समग्र नेपाली खेलकुदको विकास र प्रवर्धनमा नै असर पर्ने भएकाले व्यक्तिगत स्वार्थभन्दा पनि खेलकुदको हित हुने काममा अग्रसर हुन महासङ्घ सरोकारवालाप्रति आह्वान गरेको छ ।

महासङ्घका अध्यक्ष शिव कोइराला ‘ज्वाला’ ले नेपाली खेलकुदको विकास, विस्तारसँगै अन्तर्राष्ट्रिय क्षेत्रमा सफलता दिलाउनका लागि मद्दत पुग्ने गरी काम गर्न सदैव अग्रसर हुने विश्वास व्यक्त गरेको छ । आफ्नो पार्टी नेकपा माओवादी केन्द्रका अध्यक्ष प्रचण्ड खेलकुदप्रति विशेष चासोसँगै लगानी र प्रवर्धनमा सदैव अग्रसर हुने महासङ्घले विश्वास व्यक्त गरेको छ । खेलकुद महासङ्घका इन्चार्ज दीपक कोइराला ‘रूपक’ ले परम्परागत शैलीको प्रतिस्पर्धाभन्दा पनि खेलकुदको व्यवसायीकरण गर्दै समग्र नेपाली खेलकुदलाई नै माथि उठाउन देशका सम्पूर्ण नागरिक नै एक हुनुपर्ने आवश्यकता औँल्याएका छन् ।