झापा एफसीले नेपाल सुपर लिग (एनएसएल) को पहिलो खेलमा विपक्षीलाई निरन्तर दबाब दिए पनि परिणाम आफ्नो पक्षमा पार्न चुकेको छ । आइतबार त्रिपुरेश्वरस्थित दशरथ रङ्गशालामा झापाले बुटवलसँग गोलरहित बराबरी खेल्दै अङ्क बाँडेको हो । कप्तान इरिक विष्टले रातो कार्ड बेहोरेपछि बुटवल अन्तिम २० मिनेट १० खेलाडीमा सीमित भएको थियो । 

झापाले त्यसको फाइदा भने लिन सकेन । एक खेलाडी कम भए पनि बुटवलले रक्षापक्तिमा ध्यान दिँदै झापालाई गोल गर्नबाट रोकेको थियो । गत सिजनको भेटमा झापाले बुटवललाई हराएको थियो । 

झापाले खेल अवधिभर लगातार दबाब राखेको थियो । यस क्रममा धेरै पटक गोलको नजिक पनि पुगेको थियो  । तेस्रो संस्करणमा सुरुवाती २ खेल सकिँदा दुवै खेल बराबरीमा सकिएका छन् । पहिलो खेलमा ललितपुर सिटी र काठमाडौं रेजर्सले २–२ को बराबरीमा सकिएको थियो ।  

झापाले आक्रमणको सुरुवात आठौँ मिनेटमा गरेको थियो । बुटवलका गोलकिपर दीप कार्कीले अलहाजी गेरोको गोल गर्ने प्रयास असफल बनाएका थिए । रितिक खड्काको थ्रु बललाई अलहाजीले १२ यार्डबाट गरेको सशक्त प्रहार दीपले असफल बनाएका हुन ।

झापाको दबाब यत्तिमा रोकिएन । पहिलो आक्रमणको ५ मिनेट पछि नै  झापाले १३औँ मिनेटमा गरेको अर्को उत्कृष्ट अवसर पाएको थियो । त्यस पटक पनि  दीपले नै पन्च गर्दै झापालाई गोल गर्न बाट विमुख पारे । इसाइभ मुखामदले पेनाल्टी बक्स बाहिरबाट गरेको उत्कृष्ट लेफ्ट फुटेट सटलाई दीपले पन्च गर्दै बाहिर पठाइदिएका हुन् । झापाले एकपछि अर्को आक्रमण बुनेपछि लुम्बिनीका गोलकिपर दीप निकै व्यस्त रहे । उनले २३औँ मिनेटमा झापाका इरसिक लोजारको लामो दूरीबाट गरेको सशक्त प्रहार पनि सफल हुन दिएनन् ।

३१औँ मिनेटमा बुटवलले फ्रिकिक मार्फत आक्रमण बुनेको थियो । इजेकिइल तामाराले करिब २५ यार्डबाट गरेको फ्रिकिक पोस्टभन्दा माथिबाट बाहिरिन पुगेको हो । ३६औँ मिनेटमा रितिकको नजिकै दूरीबाट गरेको प्रहार पनि असफल हुँदा झापा अर्को एक पटक अग्रता लिनबाट चुकेको थियो । 

त्यसको २ मिनेटपछि बुटवलले पनि अवसर सृजना गरेको थियो । मध्य भागबाट प्रदीप लामाको लामो पास नियन्त्रणमा लिँदै फिलिप एडजाहले पेनाल्टी बक्सबाहिरबाट गरेको प्रहार झापाका गोलकिपर नेमान्जा लेमाजिचले मुस्किलले रोके । नेमान्जाले बल फुत्काए पनि झापाका लागि चुनौती भने भएन ।

७०औँ मिनेटमा कप्तान एरिक विष्टले रातो कार्ड सामना गरेपछि बुटवल १० खेलाडीमा सीमित भयो । एरिकले झापाका इसाइभलाई लडाएपछि  दोस्रो पहेँलो कार्ड सामना गरेका हुन् । ८९औँ मिनेटमा इसाइभले हेड गोल गर्ने अवसर सदुपयोग गर्न सकेनन् । त्यसपछि केही आक्रमण बुने पनि गोल भएन र खेल गोलरहित बराबरीमा नै सकियो ।