पछिल्ला दुई संस्करणको उपविजेता धनगढी एफसीले नेपाल सुपर लिग (एनएसएल) को तेस्रो संस्करणको पनि विजयी सुरुवात गरेको हो  । त्रिपुरेश्वरस्थित दशरथ रङ्गशालामा मंगलबार भएको खेलमा धनगढीले बुटवल लुम्बिनी एफसीलाई ४–१ ले हराउँदै सुखद सुरुआत गरेको हो । धनगढीको जितमा अहमद हिजाजीले २ गोल गरे ।  कृतीशरत्न छुन्जु र सर्जियो बारबोजुले थप गोल गरे । बुटवलका लागि भने केन्टा हाराले गोल गरे । धनगढीले पहिलो खेलबाट ३ अङ्क जोड्दा बुटवलको दुई खेलबाट एक अङ्क छ । बुटवलले पहिलो खेलमा झापा एफसीसँग १–१ को बराबरी गरेको थियो । 

धनगढीले खेलको छैटौँ मिनेटमा नै अहमद हिजाजीको गोलबाट अग्रता लिएको हो । मोहम्मत अल जेले मध्य भागबाट दिएको बललाई बुटवलका डिफेन्डरले क्लियर गर्न नसक्दा हिजाजीले नियन्त्रणमा लिँदै गोल गरेका हुन् ।

नवौँ मिनेटमा बुटवलले अवर पाउ पनि उपयोग गर्न सकेन । ३३ यार्डबाट केन्टाले प्रहार गरेको फ्रिकिक पोस्टभन्दा केही माथिबाट बाहिरिन पुग्यो । दसौँ मिनेटमा धनगढीका कृतिश रत्न छुन्जुको कडा प्रहार पोस्ट नजिकैबाट बाहिरिएको थियो । जर्जप्रिन्स कार्कीको पासमा हिजाजीको सट पोलमा लागेर फर्कियो । रिबाउन्डमा कृतीशको प्रहार विमल पाण्डेले ब्लक गरेका थिए । बुटवलले ३०औँ मिनेटमा बराबरीमा गोल फर्काउने अवसरलाई धनगढीका गोलकिपर वाइड बिरोले असफल बनाए । पेनाल्टी बक्स बाहिरबाट बुटवलका सरोज तामाङले गरेको क्रस रोक्ने धनगढीका काइसेडोको हेडर क्लियरेन्स आफ्नै पोस्टतर्फm अग्रसर थियो ।

सो बललाई धनगढीका गोलकिपर वाइडले पन्च गर्दै संकट टारिदिए । तर, लगत्तै कर्नर प्रहारमा बुटवल गोल गर्दै बराबरीमा फर्कियो । मनीष डाँगीको कर्नर प्रहारमा केन्टाले ब्याक हिलबाट बललाई जाली चुमाएका हुन् । बुटवलका सरोज तामाङले ३८औँ मिनेटमा गरेको सशक्त प्रहार धनगढीका गोलकिपर वाइड बिरोवले उत्कृष्ट बचाउ गरे ।

१–१ को बराबरीमा पहिलो हाफ सकिएको खेलको  दोस्रो हाफमा भने धनगढी प्रभावी रह्यो । ७५औँ मिनेटमा धनगढीले कृतीशरत्नको एकल प्रयासमा उत्कृष्ट गोलबाट अग्रता लियो । करिब ३५ यार्डबाट ड्रिब्लिङ गर्दै अगाडि बढेका कृतीशले बुटवलका तीन डिफेन्डरलाई छकाउँदै उत्कृष्ट गोल गरे ।

यस अघि धनगढीले केही राम्रा अवर पाए पनि खेर फालेको थियो । जर्जप्रिन्सले ६७औँ मिनेटमा करिब २६ यार्डबाट गरेको प्रहार दोस्रो बारनजिकबाट बाहिरिन पुग्यो । बुटवलका मनीष सेढाईले ७३औँ मिनेटमा गरेको सट माथिल्ला बारमा लागेर फर्कियो । धनगढीले ८६औँ मिनेटमा अग्रता बढाउने राम्रो अवसर पाएको थियो । सर्जिओ बार्बोजुको कट ब्याक पासलाई राम वाजीको करिब १८ यार्डबाट गरेको सट पोस्टको दिशामा रहन सकेन । ९०औँ मिनेटमा पनि धनगढीको काउन्टर प्रयासमा जर्जप्रिन्स कार्कीको नजिकै दूरीबाट सशक्त सट बुटवलका गोलकिपर दीप कार्कीले उत्कृष्ट बचाउ गरे ।

इन्जुरी समयमा हिजाजीले उत्कृष्ट गोल गरे । करिब मध्य भागबाट मोहम्मेतले दिएको पास नियन्त्रणमा लिँदै हिजाजीले बुटवलका गोलकिपर दीप अगाडि बढेको अवस्थामा लेफ्ट कर्नर साइडबाट उत्कृष्ट गोल गरे । धनगढीले चौथो गोल गर्दै बुटवलमाथि ४–१ को फराकिलो जित सुरक्षित ग¥यो । काउन्टर अट्याकमा भएको दोस्रो प्रयासबाट धनगढीले गोल गरेको हो । जर्जप्रिन्स र सर्जियोबीच वान टु पासबा जर्जप्रिन्सको पहिलो प्रहार बुटवलका गोलकिपर दीपले रोके । रिबाउन्ड बललाई सर्जियोले वान टच प्रहारमा गोल गरे ।