दक्षिण कोरियाको ग्वाङजुमा भइरहेको २८ औं समर युनिभर्सियाड गेम– २०१५ अन्तर्गत टेबलटेनिसको महिला सिंगल्समा नेपाल नम्बर वान नवीता श्रेष्ठ बिहीबार नकआउट चरणमा प्रवेश गरेकी छन् ।       ग्रुप ‘२२’ को लिग खेलमा नवीताले अल्जेरियाकी नास्री यस्मिनलाई ११–८, ११–७ र ११–९ को सोझो सेटमा पराजित गरिन् । त्यसअघि नवीताले सेरा लियोनकी कामारा फत्माटा विन्टुबाट वाकओभर पाएकी थिइन् । लिगको अन्तिम खेलमा नवीताले शुक्रबार माल्दोभाकी खेलाडीसंग खेल्ने छिन् । त्यो खेल गुमाएपनि नवीताको नकआउट चरणमा स्थान सुरक्षित रहनेछ ।

महिला सिंगल्समा अनिता महर्जन रोमानियाकी इस्ट्राटे रोक्सानासग ३–११, २–११ र ४–११ तथा स्टोनियाकी सेटोन क्रिस्टिनासंग २–११, ३–११ र ३–११ ले पराजित हुन पुगिन् ।       पुरुष सिंगल्सको लिग खेलमा राष्ट्रिय च्याम्पियन दीप साउनले अल्जेरियाका तेफही मोहम्मद अनिशलाई ११–६, ११–४ र ११–५ ले हराए । त्यस्तै अल्जेरियाकै अली मोहम्मदलाई पन्छ्याउने क्रममा ज्याकी महर्जनले ११–८, ११–६ र ११–६ को प्रदर्शन गरे ।

पुरुष सिंगल्सकै अन्य लिग खेलमा नेपालका आशिष अवाले लेबननका खेलाडीसंग २–३, विनेश खनियाँ रसियाका खेलाडीसंग ०–३ र अभयराज श्रेष्ठ भेनेन्ज्युएलाका खेलाडीसंग १–३ ले पराजित भए ।

जित्ज्वेली ३२ औं स्थानमा

पौडीमा नेपालकी जित्ज्वेली महर्जनले बिहीबार ३२ औं स्थान हासिल गरेकी छन् ।
महिलाको ५० मिटर फ्रिस्टायलमा सहभागी ३३ मध्ये जित्ज्वेली ३२ औं भएकी हुन् । जित्ज्वेलीले निर्धारित दूरी ३६.२८ सेकेन्डमा पूरा गरिन् । नाम्बु युनिभर्सिटी एक्वेटिक्स सेन्टरमा जित्ज्वेलीले युगान्डाकी नकिमुली मरिना एन बेत्सीलाई पछि परेका थिइन् । नकिमुलीले निर्धारित दूरी तय गर्न ३९.७१ सेकेन्ड समय खर्चिन् ।